Eks nutar ta’ 65 sena ġie kkundannat sentejn priġunerija sospiżi għal erba’ snin wara li nstab ħati li approprja eluf ta’ ewro mingħand diversi klijenti li fdawh biex jirreġistra kuntratti u jħallas it-taxxi dovuti.
Pierre Falzon ġie akkużat li, bejn l-2012 u s-snin ta’ qabel, fil-kapaċità tiegħu ta’ nutar pubbliku, naqas milli jgħaddi flejjes dovuti lid-
Dipartiment tat-Taxxi Interni kif ukoll milli jirreġistra kuntratti ta’ bejgħ u xiri ta’ proprjetà.
Din mhijiex l-ewwel sentenza kontra Falzon, hekk kif huwa kien diġà nstab ħati ta' misapproprijazzjoni f’diversi kawżi oħra u kien irrinunzja l-warrant ta’ nutar.
Falzon kien telaq telaq mill-gżejjer Maltin lejn Spanja fl-2011, fejn ġie arrestat permezz ta’ Warrant ta’ Arrest Ewropew u ġie estradit lejn Malta.
Il-prosekuzzjoni, immexxija mill-Ispettur Ian Joseph Abdilla, ressqet seba’ akkużi marbuta ma’ diversi pagamenti li seħħew f’diversi lokalitajiet madwar Malta fosthom Ħal Tarxien, l-Iklin, il-Mosta, San Pawl il-Baħar, il-Gżira u Birżebbuġa.
Mill-provi li tressqu fil-Qorti rriżulta li l-klijenti kienu jgħaddu somom sostanzjali ta’ flus lil Falzon biex iħallas it-taxxi u l-bolol dovuti, iżda meta dawn kienu jagħmlu l-verifiki tagħhom fir-Reġistru Pubbliku, kienu jsibu li l-proprjetajiet ma kinux irreġistrati fuq isimhom.
F’każ partikolari li jinvolvi familja mill-Mosta, Falzon kien irċieva s-somma ta’ Lm65,700 (€153,039) fl-2007, iżda sal-2014 il-kuntratt kien għadu ma ġiex irreġistrat.
Vittma oħra xehed li meta pprova jbigħ art li kien xtara fl-Iklin, skopra li din ma kinitx irreġistrata fuqu. Dan wasslu biex kellu jħallas mill-ġdid il-flus li kien ħallas għall-art sabiex ikun jista’ jikkonkludi l-bejgħ.
Huwa żied li inizjalment Falzon kien beda jħallsu lura b’pagamenti żgħar, iżda mbagħad waqaf jirrispondi, u dan wassal biex infetħu proċeduri ċivili.
Id-difiża sostniet li Falzon ma kellux l-intenzjoni li jiffroda lill-klijenti tiegħu, u li dak li ġara kien riżultat ta’ negliġenza professjonali f’perjodu diffiċli f’ħajtu.
Falzon stqarr li dak iż-żmien kien għaddej minn problemi finanzjarji serji, filwaqt li martu kienet marida u kellu jivvjaġġa spiss magħha, u dan wasslu biex jittraskura x-xogħol tiegħu.
Huwa spjega wkoll li minħabba mandati ta’ sekwestru kontrih, kien qed jiddepożita ċ-ċekkijiet tal-klijenti f’kontijiet ta’ kumpaniji tiegħu jew f’isem martu, sabiex aktar tard joħroġ bank draft favur id-dipartiment tat-taxxa.
Madankollu, il-Qorti ma aċċettatx li dan kien każ ta’ negliġenza biss. Fis-sentenza tagħha mogħtija t-Tlieta il-Maġistrat Ann Marie Thake osservat li l-klijenti fdaw il-flus lill-imputat sabiex il-kuntratti tagħhom jiġu rreġistrati fi żmien raġonevoli, u mhux wara snin twal.
Il-Qorti nnutat ukoll li l-fatt li l-flus ġew impoġġija f’kontijiet ta’ terzi mingħajr il-kunsens tal-klijenti jikkonferma l-element ta’ approprjazzjoni indebita.
Falzon instab ħati ta’ sitta mis-seba’ akkużi miġjuba kontrih, u ġie meħlus minn akkuża waħda relatata ma’ kuntratt fil-Gżira, fejn irriżulta li d-dewmien ma kienx tort tiegħu.
Meta waslet biex tiddeċiedi l-piena, il-Qorti kkunsidrat diversi fatturi, fosthom l-età tal-imputat, il-fatt li l-każ ilu pendenti għal 13-il sena, u rapport tal-uffiċjal tal-probation li jindika li Falzon sab impjieg klerikali u qed juża d-dħul tiegħu biex iħallas lura lill-vittmi.
Ġie nnutat ukoll li ħafna mill-vittmi kienu diġà ġew ikkumpensati jew li l-kuntratti tagħhom ġew irreġistrati qabel ma bdew il-proċeduri kriminali.
Minkejja s-serjetà tar-reat, il-Qorti kkonkludiet li piena ta’ priġunerija effettiva ma kinitx meħtieġa, peress li Falzon ma jitqiesx bħala periklu għas-soċjetà u diġà tilef il-warrant tiegħu.
Għaldaqstant, is-sentenza ta’ sentejn ħabs ġiet sospiża għal erba’ snin.
Fl-istess waqt, il-Qorti ordnat lil Falzon iħallas €54,162 lil klijenta oħra fi żmien sitt xhur.
.png)
