Raġel ta’ 72 sena jingħata probation wara li ammetta li għamel reati sesswali

Raġel ta’ 72 sena, John Camilleri, ġie kkundannat wara li ammetta għal diversi imputazzjonijiet relatati ma’ reati ta’ natura sesswali, fastidju u arrest illegali ta’ żewġ nisa.

Camilleri, residenti San Pawl il-Baħar, kien akkużat li wettaq atti ta’ natura sesswali mingħajr il-kunsens ta’ żewġ vittmi. Huwa kien akkużat ukoll li, mingħajr awtorità skont il-liġi, arresta jew żamm lill-istess vittmi kontra r-rieda tagħhom bħala mezz biex iġiegħlhom jagħmlu jew joqogħdu għal atti li joffendu l-mistħija tas-sess tagħhom.

Barra minn hekk, l-imputat ġie akkużat li aġixxa b’mod li kkawża fastidju u biża’ li setgħet tintuża vjolenza kontra l-vittmi kif ukoll li uża mezzi ta’ komunikazzjoni elettronika b’mod mhux xieraq.

Fis-seduta tat-3 ta’ Settembru 2025, Camilleri irreġistra ammissjoni għall-imputazzjonijiet kollha miġjuba kontrih. Il-Qorti wissietu dwar il-konsegwenzi serji ta’ tali ammissjoni, inkluż il-fatt li kien qed jiffaċċja piena massima ta’ sa 14-il sena priġunerija u multa ta’ €37,500. Wara li ngħata ż-żmien biex jikkonsulta mal-avukat difensur tiegħu, l-imputat ikkonferma l-ammissjoni tiegħu.

Il-Qorti semgħet ukoll ix-xhieda tal-Uffiċjal tal-Probation u rat ir-rapport ta’ qabel is-sentenza, li fih ġie indikat li minkejja l-ammissjoni tiegħu, l-imputat ma wera l-ebda rimors u sostna li l-aġir tiegħu kien “vendikazzjoni”. Ir-rapport irrimarka wkoll li l-imputat għandu bżonn intervent professjonali biex jindirizza problemi ta’ natura sesswali, sabiex jitnaqqas ir-riskju li reati simili jerġgħu jirrepetu ruħhom.

Fit-trattazzjoni finali fuq il-piena, kemm il-Prosekuzzjoni kif ukoll id-Difiża indikaw li ma kinux jinsistu fuq piena ta’ ħabs effettiv, iżda fuq piena riformattiva fl-interess li ma jerġgħux iseħħu inċidenti simili.

Il-Qorti sabet lill-imputat ħati tal-akkużi kollha u kkundannatu għal Ordni ta’ Probation għal perjodu ta’ tliet snin, b’kundizzjonijiet stretti, inkluż li jsegwi trattament relatat mal-imgieba tiegħu ta’ natura sesswali.

Il-Qorti ħarġet ukoll Ordni ta’ Trażżin għal perjodu ta’ tliet snin favur iż-żewġ vittmi, biex tipprovdi għas-sigurtà tagħhom, u wissiet lill-ħati bil-konsegwenzi serji jekk jikser il-kundizzjonijiet tal-probation jew tal-ordni ta’ trażżin.