Mara ta’ 25 sena residenti San Pawl il-Baħar inżammet arrestata wara li wieġbet mhux ħatja għal akkużi ta’ frodi fuq skala kbira, li allegatament wasslu biex madwar 200 persuna spiċċaw vittmi ta’ skema kriminali online.
Tammy Caruana, li qalet lill-qorti li hija bla xogħol, tressqet quddiem il-Qorti wara investigazzjoni estensiva mwettqa mid-Dipartiment tal-Investigazzjonijiet dwar Reati Finanzjarji fi ħdan il-Korp tal-Pulizija, f’koordinazzjoni mal-Europol u l-awtoritajiet fl-Irlanda u fir-Renju Unit.
Skont il-pulizija, Caruana hija suspettata li kienet il-persuna prinċipali lokali wara skema ta’ frodi online, li fiha allegatament kienet tippreżenta ruħha bħala bank biex tqarraq bil-vittmi. L-investigazzjonijiet s’issa identifikaw madwar 200 vittma, li bejniethom sofrew telf finanzjarju ta’ madwar €1 miljun.
L-investigazzjoni wasslet għall-arrest, fit-2 ta’ Frar, ta’ Caruana u tan-nannu tagħha ta’ 82 sena. Il-pulizija qalet li l-inkjesti qed juru rabtiet ma’ netwerk kriminali internazzjonali b’konnessjonijiet fl-Irlanda u fir-Renju Unit.
Matul l-operazzjoni, il-pulizija ssekwestrat madwar €8,000 fi flus kontanti minn residenza f’Raħal Ġdid. Tfittxija separata fil-Qrendi wasslet għas-sekwestru ta’ diversi mowbajls u apparat elettroniku ieħor. L-investigazzjonijiet għadhom għaddejjin.
Il-qorti, ippreseduta mill-Maġistrat Caroline Farrugia Frendo, laqgħet talba għall-iffriżar u s-sekwestru tal-assi tal-imputata. Id-difiża talbet il-ħelsien mill-arrest, iżda l-prosekuzzjoni oġġezzjonat, u sostniet li minħabba s-serjetà tal-allegat reati u l-fatt li l-pulizija għadha teħtieġ tiġbed data mill-apparat elettroniku, kien prematur li tingħata l-libertà proviżorja. Ġie enfasizzat ukoll ir-riskju li, jekk tinħeles, l-imputata setgħet tħassar jew tinterferixxi mad-data online.
Il-Maġistrat ċaħdet it-talba għall-ħelsien mill-arrest.
Il-prosekuzzjoni tmexxiet mill-Ispettur Claire Vella Borg, bl-assistenza tal-avukati Marica Ciantar u Mauro Abela f’isem l-Avukat Ġenerali. L-avukat Stefano Filetti deher bħala parte civile f’isem Bank of Valletta plc. L-imputata kienet irrappreżentata mill-avukati Roberto Spiteri u Franco Galea.
