Il-Qorti Kostituzzjonali tħassar kumpens ta’ €61,000 mogħti lil eks supretendent

Il-Qorti Kostituzzjonali ħassret sentenza li kienet tat €61,000 f’danni lill-eks superintendant tal-pulizija Raymond D’Anastas, u ddeċidiet li d-deċiżjoni tal-qorti tal-ewwel istanza ma kinitx motivata b’mod xieraq u għalhekk trid terġa’ tinstema’.

D’Anastas kien ikkontesta l-proċess tal-promozzjonijiet fil-pulizija wara li ma ġiex magħżul għall-kariga ta’ assistent kummissarju, u sostna li ġie diskriminat. Filwaqt li l-qorti tal-ewwel istanza laqgħet it-talba tiegħu u tat kumpens, il-Qorti Kostituzzjonali sabet li s-sentenza kienet nieqsa minn motivazzjoni suffiċjenti u għalhekk ma setgħetx tibqa’ fis-seħħ.

L-appell tressaq mill-Avukat tal-Istat u mill-Kummissarju tal-Pulizija, li argumentaw li l-Prim’Awla tal-Qorti Ċivili naqset milli tispjega b’mod adegwat kif waslet għall-konklużjonijiet tagħha u li bbażat ruħha fuq raġunament kontradittorju. Huma kkontestaw ukoll is-sejba li d-drittijiet fundamentali ta’ D’Anastas kienu nkisru. Min-naħa tiegħu, D’Anastas ressaq appell inċidentali fejn insista li d-danni mogħtija kienu insuffiċjenti.

D’Anastas ingħaqad mal-Korp tal-Pulizija ta’ Malta f’Diċembru tal-1979, ġie promoss għall-grad ta’ ispettur fl-1990 u aktar tard għal dak ta’ superintendant fl-2006. F’Awwissu tal-2016, il-pulizija ħarġu sejħa għall-applikazzjonijiet għall-kariga ta’ assistent kummissarju, li attirat 20 kandidat. L-intervisti saru f’Jannar tal-2017, u wara ġew promossi 10 uffiċjali. Erba’ ħatriet oħra saru bejn l-2018 u l-2020.

D’Anastas ma ġiex magħżul wara li falla fl-intervista. Huwa sostna li l-proċess kien imċappas u li kien diġà magħruf li ma kienx se jiġi promoss. Wara lment li ma rnexxiex quddiem il-Kummissjoni għas-Servizz Pubbliku, huwa talab investigazzjoni mill-Ombudsman.

L-eks Ombudsman Anthony Mifsud ikkonkluda li l-proċess tal-promozzjonijiet kien difettuż u kompromess, u sab li l-Kummissarju tal-Pulizija ta’ dak iż-żmien, Lawrence Cutajar, kien ibbaża l-għażliet tiegħu fuq fiduċja personali aktar milli fuq kriterji oġġettivi. Mifsud irrakkomanda li tinħareġ sejħa ġdida għall-promozzjonijiet u ssuġġerixxa li D’Anastas jingħata €15,000 f’danni morali. Dawn ir-rakkomandazzjonijiet ma ġewx adottati mill-pulizija.

Sussegwentement, D’Anastas fetaħ proċeduri kostituzzjonali kontra l-Istat u kontra l-Kummissarju tal-Pulizija. Il-Prim’Awla tal-Qorti Ċivili ddeċidiet li l-evidenza wriet li diversi kandidati, u mhux biss ir-rikorrent, kienu ġew iffavoriti waqt il-proċess tal-għażla, u tat lil D’Anastas €61,000 f’danni.

Madankollu, il-Qorti Kostituzzjonali qalet li l-qorti inferjuri naqset milli tispjega kif waslet għall-konklużjoni li D’Anastas kien sofra diskriminazzjoni. Hija nnutat li s-sentenza ma identifikatx il-fatti li wasslu lill-qorti biex tikkonkludi li l-kandidati kienu effettivament intgħażlu qabel ma tlesta l-proċess tal-għażla.

Il-Qorti Kostituzzjonali saħqet li jekk il-qorti inferjuri bbażat ruħha fuq is-sejbiet tal-Ombudsman, kienet obbligata tispjega għaliex qablet magħhom. Fin-nuqqas ta’ tali raġunament, is-sentenza ma setgħetx tiġi kkonfermata.

Filwaqt li ħassret id-deċiżjoni, il-Qorti Kostituzzjonali ċċarat li ma kinitx qed tiddeċiedi dwar il-mertu tat-talbiet ta’ D’Anastas. Minflok, iddikjarat li l-każ għadu mhux solvut u li għandu jerġa’ jiġi kkunsidrat mill-Prim’Awla tal-Qorti Ċivili, li issa trid toħroġ sentenza ġdida, sħiħa u motivata kif xieraq.