Kumpanija li topera fis-settur tal-kannabis mediċinali ġiet ordnata tħallas penali ta’ €2.4 miljun u titlaq mill-faċilitajiet industrijali tagħha f’Ħal Far wara li l-Bord tar-Regolamentazzjoni tal-Kera ddeċieda li sensiela twila ta’ ħlasijiet tard wasslet għat-terminazzjoni awtomatika ta’ kuntratt ta’ kiri ta’ 15-il sena.
F’sentenza mogħtija l-Ġimgħa, il-Maġistrat Joseph Gatt, li ppresieda l-Bord, sab li JMCC Life Sciences Europe Ltd – li qabel kienet topera taħt l-isem Materia Malta Operating Ltd – waqgħet ripetutament f’arretrati u baqgħet tokkupa l-proprjetà għal 480 jum wara li l-kuntratt kien ġie tterminat permezz ta’ klawżola espliċita fil-ftehim.
Il-każ kien jikkonċerna unità industrijali kbira, magħrufa bħala HHF308, fiż-Żona Industrijali ta’ Ħal Far, li kienet mikrija minn CHAS Ltd lil JMCC sa l-2036, b’perjodu protett ta’ di fermo sa' Mejju tal-2028.
Il-Bord sema’ kif mill-ħarifa tal-2023 ’l hawn, JMCC bdiet tħallas il-kera u l-ħlasijiet ta’ key money dejjem aktar tard, f’ċerti każi aktar minn xahrejn wara d-data dovuta, minkejja obbligu kuntrattwali li l-ħlasijiet isiru 10 ijiem qabel kull perjodu ta’ kiri. Ix-xhieda kkonfermat ukoll li l-pagi tal-impjegati kienu qed jitħallsu b’dewmien ta’ xhur.
Sa Awwissu tal-2024, meta CHAS ressqet il-kawża, il-kerrej kien f’arretrati ta’ tliet xhur li jammontaw għal €51,397, minbarra ħlasijiet ta’ servizzi. Il-proprjetarju kien bagħat tliet ittri ġudizzjarji biex javża lill-kumpanija tirregolarizza l-pożizzjoni tagħha, bl-aħħar waħda nnotifikata fl-20 ta’ Awwissu 2024.
Skont il-klawżola 10.02(a) tal-kuntratt, nuqqas ta’ ħlas wara tali avviż jikkostitwixxi ksur materjali, li jwassal għat-terminazzjoni awtomatika tal-kuntratt wara 15-il jum.
JMCC sostniet li l-arretrati kienu tħallsu qabel l-ewwel seduta permezz ta’ pagament ta’ €75,194 minn kumpanija terza tal-CEO tagħha, Diane Scott. Argumentat ukoll li peress li l-Bord kien għadu ma ddikjarax it-terminazzjoni tal-kuntratt, il-penali kuntrattwali – fosthom ħlas sħiħ tal-di fermo u multa ta’ €5,000 kuljum talli ma telqitx mill-proprjetà – ma kinux dovuti.
Il-Bord ċaħad dan l-argument, u sostna li l-kuntratt kien ġie tterminat bil-funzjonament tiegħu stess u mhux bis-sentenza tal-Qorti. Irrimarka wkoll li d-dewmien bankarju li JMCC attribwiet lis-settur tal-kannabis kien prevedibbli u qatt ma ġie kkomunikat lill-proprjetarju.
Filwaqt li rrikonoxxa li l-arretrati kienu effettivament tħallsu, u għalhekk dawk it-talbiet kienu rranġati, il-Bord iddeċieda li l-klawżola ta’ penali ta’ €5,000 kuljum kienet valida u infurzabbli. Peress li JMCC baqgħet tokkupa l-proprjetà illegalment mill-20 ta’ Awwissu 2024 sad-data tas-sentenza, il-multa laħqet €2.4 miljun, flimkien ma’ interessi legali.
Il-Bord, madankollu, ċaħad talba separata ta’ CHAS għal €923,523 relatata mal-kera li kien fadal fil-perjodu ta’ di fermo, u qal li l-proprjetarju ma jistax jirkupra darbtejn għall-istess dannu. Kien spjega li ladarba l-kerrej għażel li jibqa’ fil-proprjetà illegalment, is-sanzjoni applikabbli kienet il-multa ta’ kuljum, u mhux il-kera aċċellerata.
Is-sentenza ddikjarat li l-kuntratt ġie tterminat fl-20 ta’ Awwissu 2024, ordnat lil JMCC tbattal il-proprjetà fi żmien 40 jum, imponiet il-ħlas ta’ €2.4 miljun flimkien ma’ interessi, u tat l-ispejjeż kollha tal-kawża lil CHAS Ltd.
Fl-osservazzjonijiet finali tiegħu, il-Bord saħaq li “l-kuntratt huwa l-liġi bejn il-partijiet”, u li l-partijiet infushom kienu stabbilixxew żewġ rimedji distinti: wieħed jekk il-proprjetà tiġi abbandunata fil-pront, u ieħor jekk tinżamm illegalment. L-imġiba ta’ JMCC, qal il-Bord, attivat b’mod ċar it-tieni rimedju.
L-avukati Joseph Gerada u Axl Camilleri dehru għal CHAS Ltd.
.jpeg)
