Raġel ta’ 33 sena minn Birkirkara, li jaħdem bħala żviluppatur tal-web, inħeles mill-arrest taħt kundizzjonijiet stretti wara li tressaq il-Qorti mixli b’fastidju u theddid lill-ex sieħba tiegħu. Huwa wieġeb mhux ħati għal akkużi ta’ fastidju, biża’ ta’ vjolenza, theddid permezz ta’ apparat elettroniku u ksur tal-paċi pubblika.
L-Ispettur Christian Cauchi spjega li l-allegata vittma għamlet żewġ rapporti konsekuttivi f'jumejn, fejn sostniet li l-akkużat baqa’ jikkuntattjaha bla waqfien minn Marzu minkejja li kienet qaltlu biex jieqaf. Fi kliem l-Ispettur, l-akkużat ma riedx jaċċetta li r-relazzjoni kienet spiċċat. F’waħda mill-okkażjonijiet kien mar jsegwiha fuq ix-xogħol u heddedha li “jeqirdilha ħajjitha”. Darba oħra, il-pulizija sabuh barra darha u ordnawh jitlaq, fejn imbagħad ġie eskortat lura Dar Papa Franġisku fejn jgħix bħala parti minn programm ta’ rijabilitazzjoni.
Il-pulizija rrimarkaw ukoll li l-akkużat kellu obbligu jiffirma l-karta tal-ħelsien mill-arrest kuljum, iżda naqas jagħmel dan fil-jum tal-inċident. Meta ġie arrestat, qal li ma kellux flus jew trasport. L-Ispettur esprima tħassib li l-akkużat seta’ jerġa’ jipprova jikkuntattja lill-mara, anke billi juża numri differenti kif allegatament diġà għamel.
Id-difiża, immexxija mill-avukat Peter Fenech assistit minn Nathalia Camilleri, qalet li ma seħħet l-ebda vjolenza fiżika u li l-akkużat qed jaffaċċja diffikultajiet personali u finanzjarji.
Il-Maġistrat Kevan Azzopardi ta lill-akkużat il-ħelsien mill-arrest wara li wissieh serjament biex ma jikkuntattjax lill-allegata vittma u josserva b’mod strett il-kundizzjonijiet imposti fuqu, inkluż garanzija personali ta’ €5,000 u firma ta’ kuljum. Ġiet imposta wkoll ordni ta’ trattament.
Il-maġistrat wissieh: "Tkissirx il-fiduċja li qed tpoġġi fik il-qorti. Ma rridx narak hawn qatt aktar. Trid tinsiha u tibda mill-ġdid. Jekk tikser il-kundizzjonijiet tal-libertà proviżorja, tkun qed tħaffer il-qabar tiegħek".
L-Ispettur Christian Cauchi mexxa l-prosekuzzjoni.
.png)
