Ħaddiem jmut wara li waqa' f'sit ta’ kostruzzjoni ta’ db towers f’Pembroke

Ħaddiem Tork ta’ 25 sena tilef ħajtu kmieni l-Erbgħa filgħodu wara li waqa’ żewġ sulari waqt xogħol fuq il-proġett tad-db towers f’Pembroke.

L-inċident seħħ għall-ħabta tat-7:45am, meta – skont il-Pulizija – intalbet l-assistenza ta’ tim mediku u tad-Dipartiment tal-Protezzjoni Ċivili. Minkejja l-isforzi tal-ekwipaġġ mediku, il-ħaddiem ġie ċċertifikat mejjet fuq il-post.

Magistrate Joseph Mifsud qed imexxi inkjesta maġisterjali, filwaqt li l-Pulizija qed tkompli bl-investigazzjonijiet tagħha. L-Awtorità għas-Saħħa u s-Sigurtà fuq il-Post tax-Xogħol (OHSA) tinsab ukoll fuq il-każ.

Kelliem għad-db Group ikkonferma li l-vittma kienet impjegata mal-kumpanija Torka HAS, li hija waħda mis-subkuntratturi involuti fil-proġett. Huwa spjega li rappreżentanti tal-kumpanija kienu fuq il-post flimkien ma’ uffiċjali tal-OHSA u tal-Pulizija hekk kif bdew l-investigazzjonijiet.

“Id-db Group qed u se jkompli jikkollabora bis-sħiħ mal-awtoritajiet investigattivi rispettivi. Il-grupp ukoll iwiegħed l-appoġġ kollu tiegħu lill-familja tal-vittma u lill-kollegi,” qal il-kelliem.