Erba’ residenti fis-Swieqi ressqu protest ġudizzjarju kontra l-Kummissarju tal-Pulizija u l-Avukat tal-Istat wara li allegaw li pulizija armati daħlu bi vjolenza fid-dar tagħhom bi żball waqt rejd.
Skont il-protest, l-inċident seħħ x-xahar li għadda fi Triq is-Swieqi, meta tim ta’ uffiċjali armati allegatament daħal b’saħħtu fl-appartament tagħhom mingħajr ma wrew identifikazzjoni jew spjegaw għaliex kienu qed jinvadu l-proprjetà.
Wieħed mir-residenti qal li fetaħ il-bieb wara li sema’ storbju fil-komun tal-blokka, billi ħaseb li kien qed iseħħ argument jew ġlied. Hekk kif fetaħ, uffiċjal armat qabad jipponta arma lejn rasu, u dan wasslu biex jerġa’ jidħol lura. Ir-residenti qalu li pprovaw isibu kenn fil-gallarija u ċemplu lis-servizzi tal-emerġenza, iżda ħadd ma wasal biex jgħinhom. L-uffiċjali mbagħad allegatament sfurzaw id-dħul mil-livell t'isfel tad-duplex
Skont il-protest, il-pulizija ppontaw ir-rifles direttament lejn wiċċhom u ġagħluhom joqogħdu għarkupptejhom taħt il-mira tal-armi, tant li ħasbu li kienu se jiġu eżegwiti. Wieħed mir-residenti ġie marbut b’idejh bil-manetti u b’cable ties, filwaqt li l-oħrajn ukoll ġew marbuta b’mod simili.
Kien biss meta semgħu lill-istess uffiċjali jgħajtu “police” waqt li kienu qed ikissru bieb ta’ appartament ieħor fil-binja, li r-realizzaw li d-dħul kien ġej mill-pulizija u mhux minn kriminali.
Ir-residenti qalu li sofrew tbatija u trawma psikoloġika serja minħabba l-imġiba aggressiva tal-uffiċjali. Huma żiedu li ma ngħatawx l-opportunità li jressqu rapport dwar l-inċident, minkejja li uffiċjal wiegħed li jikkuntattjahom iżda qatt ma għamel dan.
Fil-protest ġudizzjarju tagħhom, ir-residenti qalu li ġew miksura d-drittijiet fundamentali tagħhom għal-libertà u s-sigurtà personali, kontra trattament inuman jew degradanti, għall-privatezza u l-ħajja familjari, kif ukoll għar-rimedju effettiv.
Il-protest jesiġi li jitħarsu l-filmati kollha tal-body cameras u kull reġistrazzjoni oħra relatata mar-rejd allegat. Il-protest ġudizzjarju kien iffirmat mill-avukati Edward Gatt, Mark Vassallo, Shaun Zammit u Carina Nagiah.
