Raġel ta’ 35 sena minn Bormla, Josef Grech, ingħata l-ħelsien mill-arrest taħt kundizzjonijiet stretti, wara li tressaq il-Qorti fuq akkużi ta’ traffikar ta’ kokaina u kannabis.
Grech, li diġà kien taħt kundizzjonijiet ta’ ħelsien mill-arrest minn każ ieħor, inqabad il-ġimgħa li għaddiet waqt roadblock tal-Pulizija, meta l-awtoritajiet innotaw karozza mikrija suspettuża.
Fit-tfittxija li saret fuq il-karozza, il-Pulizija sabu pakketti ta’ kokaina, borża kbira b’kannabis u ammont konsiderevoli ta’ flus kontanti.
Tfittxijiet sussegwenti fid-djar tiegħu f’Bormla u Ħal Tarxien wasslu wkoll biex jinstab tagħmir għall-ippakkjar tad-droga, waqt li Mercedes marbuta mal-investigazzjoni ġiet ikkonfiskata f’Marsaskala.
Skont l-Ispettur Mark Mercieca, li mexxa l-operazzjoni, ġew ukoll sekwestrati flus u ġojjellerija li kienu identifikati aktar tard permezz ta’ kontijiet fuq il-midja soċjali marbuta ma’ Grech.
Il-Pulizija qalet li l-vettura kienet innotata filgħaxija, waqt roadblock, fejn ġie osservat skambju ma’ persuna oħra li qajjem suspett.
Meta ġie mwaqqaf, Grech deher nervuż u aġitat, u taħt is-seattas-sewwieq instab sustanza ħadra, filwaqt li flus kontanti nstabu f’kompartimenti differenti tal-karozza.
Investigazzjonijiet aktar tard żvelaw li Grech kellu BMWs irreġistrati f’ismu u ammonti kbar ta’ flus u muniti, li skont il-Pulizija jsaħħu s-suspetti ta’ attività illegali u ksur tal-kundizzjonijiet tal-ħelsien mill-arrest li kellu minn qabel.
Il-prosekuzzjoni opponiet il-ħelsien mill-arrest, billi qalet li Grech għandu storja ta’ ksur ta’ kundizzjonijiet imposti mill-qorti u hemm riskju ta’ reċidiva jew ta’ tfixkil tal-provi.
Iżda l-avukat tiegħu, Franco Debono, sostna li l-akkużat kellu bżonn kura medika għal infezzjoni u li kien lest jikkopera mal-awtoritajiet.
Il-Maġistrat Caroline Farrugia Frendo approvat il-ħelsien mill-arrest taħt kundizzjonijiet stretti, fosthom li Grech għandu jattendi l-proċeduri kollha tal-qorti, jibqa’ f’Malta u ma jikkuntattjax xhieda, ma jikkommettix reat ieħor, jirrappurta tliet darbiet fil-ġimgħa fl-Għassa tal-Pulizija ta’ Bormla u jissottometti l-passaport u l-karta tal-identità tiegħu
Grech ġie ordnat ukoll li jħallas depożitu ta’ €3,500 u jipprovdi garanzija personali ta’ €20,000. Il-Qorti wissietu li kwalunkwe ksur ta’ dawn il-kundizzjonijiet iwassal għar-revoka immedjata tal-ħelsien u għal mandat ġdid ta’ arrest.
Storja ta’ każi serji preċedenti
Grech diġà kien akkużat f’Novembru 2023 b’reati serji ta’ ġrieħi gravi, wara li allegatament attakka ħabib b’sikkina waqt binge ta’ sitt ijiem fuq kokaina.
F’dak il-każ, il-vittma sofra ġrieħi gravi u tpoġġa f’kundizzjoni kritika, filwaqt li l-Pulizija sabu lil Grech f’qagħda ta’ intossikazzjoni severa, tant li ma setax jiffirma biex isir test tossikoloġiku.
Grech qed jiġi difiż mill-avukati Franco Debono u Marion Camilleri.
