Anton Joseph Debono, ta’ 24 sena, imwieled il-Moska u resident f’Malta, tressaq ilbieraħ quddiem il-Qorti taħt arrest u wieġeb mhux ħati għal diversi akkużi fosthom li hedded u attakka uffiċjal tal-Pulizija, oppona l-arrest, weġġa’ ħafif uffiċjal, kiser is-serenità pubblika u ma obdiex ordnijiet tal-Pulizija.
L-inċident seħħ fi-21 ta’ Ottubru 2025 fl-Isptar Mater Dei, fejn Debono kien qed jirċievi kura għal id miksura. Il-persunal tas-sigurtà tal-isptar ċempa lill-Pulizija wara li l-akkużat allegatament insulta lill-ħaddiema u qalilhom, fost l-oħrajn, “The Indians are better than you” u “you’re all in the clouds.”
Meta waslu l-pulizija fuq il-post, Debono irrifjuta li jagħti d-dettalji tiegħu, u meta ppruvaw jżommuh, ta daqqa ta’ ponn lil wieħed mill-uffiċjali, li wasslet biex ġew imsejħa aktar membri tal-korp.
Id-difiża, immexxija mill-avukat Veronique Dalli, argumentat li Debono kien irreaġixxa bl-uġigħ meta uffiċjali qabduh b’idu diġà mweġġa’, u dan aggrava l-kundizzjoni tiegħu. Id-difiża kkontestat l-arrest u talbet li l-uffiċjali tal-arrest jiġu mħarrka biex jixhdu.
Il-prosekuzzjoni, immexxija mll-Ispettur Elton Buckingham, ressqet filmati mill-bodycam tal-pulizija biex juru x’ġara. Wara li rat il-footage, il-Qorti, preseduta mill-Maġistrat Joseph Gatt, osservat li l-akkużat kien f’distress evidenti u li l-mod kif ġie trattat żied l-uġigħ tiegħu.
Il-Qorti qablet mad-difiża u ddikjarat li l-arrest kien null u invalidu skont l-Artikolu 355 tal-Kodiċi Kriminali. B’riżultat ta’ dan, Debono ġie meħlus mill-arrest, filwaqt li d-difiża ma talbitx għal ħelsien mill-arrest (bail) minħabba d-deċiżjoni tal-qorti.
