Turist Brittaniku li kien akkużat li kkawża ġrieħi gravi f’konfront vjolenti fil-lukanda db Seabank f’Mellieħa, ġie meħlus minn kull ħtija wara li l-qorti sabet li l-mewt tal-vittma ma kellha x’taqsam xejn mal-ġlieda.
Liam Joseph Stacey kien tressaq il-qorti f’Lulju akkużat li weġġa’ b’mod gravi lil Roderick Sciortino, ta’ 38 sena, waqt argument li nqala’ fejl-pixxina tar-resort fejn Stacey kien qiegħed mal-partner tiegħu u t-tifel żgħir tagħhom.
Skont ix-xhieda fil-qorti, il-konfront beda meta grupp ta’ Maltin li allegatament kienu fis-sakra resqu lejn Stacey. F’dak il-mument, Sciortino laqat lil Stacey b'daqqa f’wiċċu, li kkawżatlu jaqa’ fuq it-tifel tiegħu. Stacey wieġeb billi tah daqqa waħda lura f’wiċċu.
Sciortino aktar tard iddaħħal l-Isptar Mater Dei, fejn sofra emorraġija fil-moħħ u waqa' f'koma. Miet jiem wara, fil-31 ta' Lulju.
Madankollu, l-espert mediku-legali maħtur mill-qorti, Dr Mario Scerri, xehed li l-mewt ta’ Sciortino ma kinitx ikkawżata minn xi ġrieħi li seta’ sofra waqt il-ġlieda.
“It-tilqim kien minimu u ma kien hemm l-ebda sinjal ta’ trawma li tista’ tispjega li ġara,” qal Dr Scerri fil-qorti, iżid jgħid li l-analiżi post-mortem sabet biss tbenġila żgħira li ma kellha ebda rabta.
Hu spjega wkoll li l-pressjoni għolja u l-livelli ta’ alkoħol għoljin fid-demm tal-vittma setgħu waħedhom ikkawżaw ir-rapture fil-moħħ.
Il-qorti, preseduta mill-Maġistrat Donatella Frendo Dimech, qalet li l-prosekuzzjoni ma rnexxilhiex tistabbilixxi rabta kawżali bejn id-daqqa ta’ Stacey u l-mewt ta’ Sciortino. Il-Maġistrat żiedet tgħid li r-reazzjoni ta’ Stacey kienet “azzjoni riflessa ta’ awtodifiża” wara li ġie attakkat bla provokazzjoni.
B’hekk, Stacey ġie assolut minn kull akkuża.
Il-każ kien immexxi mill-Avukat tal-Avukat Ġenerali Brandon Bonnici flimkien mal-Ispetturi Bradley Grima u Clayton Camilleri. Id-difiża kienet immexxija mill-Avukat Stefano Filletti, filwaqt li l-Avukat Rachel Tua dehret f’isem il-familja Sciortino.
