Raġel - li qal illi fetaħ diversi rapporti mal-pulizija kontra Frankie Grima, li kien sid ta diversi stabbilimenti ta' divertiment f'Paceville, hekk kif qed isostni li Grima kien heddu u darba saħansitra ta daqqa ta' ponn lil martu - hu stess spiċċa qed ikun akkużat b'theddid hekk kif mal-pulizija ilmenta dwar kif ma humiex qed jieħdu azzjoni fuq il-każ u staqsa jekk għandux jispara lil Grima.
Ir-raġel mill-Mellieħa deher quddiem il-Maġistrat Charmaine Galea u kien akkużat li uża ħażin tagħmir ta' telekomunikazzjoni u li kiser il-liċenzja tal-armi.
Iż-żewġ irġiel għandhom boathouses fl-Armier li jmissu ma' xulxin u huwa mifhum li n-nuqqas ta' qbil dwar terrazzin estern barra l-boathouse ta' Grima, kien ilu għaddej żmien. L-akkużat huwa mifhum li għamel diversi rapporti kontra Grima, li wħud minnhom huma suġġett ta' proċeduri fil-Qorti.
Filmati CCTV juru lil Grima jsabbat b'rabja fuq il-bieb tal-akkużat, jidgħi u jgħajjat, "ejja oħroġ ħa nqattgħek."
F'ġurnata differenti Grima jerġa' jidher isabbat fuq il-bieb u wara jagħti daqqa f'wiċċ mara wara li fetħet il-bieb. L-akkużat spjega li l-mara fil-filmat hija martu u li f'dik l-okkażjoni Grima kien akkużah illi seraqlu l-kelb.
Minkejja li Grima qed jiffaċċja proċeduri kriminali fuq uħud mir-rapporti li għamel l-akkużat, l-avukat Difensur sostna li għad hemm aktar akkużi x'joħorġu.
Minkejja dan kien l-akkużat li daher fl-iżbarra llum u dan hekk kif f'telefonata mal-pulizija huwa kien staqsa: "Xi tridni nagħmel jekk jerġa' jiġi għalija? Nisparalu?" Wara li qal dan il-kliem saret tfittxija mill-pulizija fil-boathouse tal-akkużat li waslet biex jinstabu żewġ armi li fuqhom ma kinitx għadha tħallset il-liċenzja.
