Tim ta' psikjatri informaw lill-Qorti illi Abner Aquilina - li jinsab akkużat bil-qtil tal-istudenta Pollakka Paulina Dembska - mhuwiex f'qagħda li jgħaddi ġuri.
It-tliet psikjatri: Anthony Dimech, Anton Grech u George Debono llum qraw il-konklużjonijiet li waslu għalihom u li jgħidu illi Aquilina kien jinsab fi stat gravi ta' psikożi meta fil-fatt qatel lil Dembska u allura f'dan l-istadju mhuwiex fi stat li jgħaddi ġuri.
Il-Psikjatri qalu illi huma tkellmu mal-akkużat f'ħames okkażjonijiet separati u li l-konklużjonijiet tagħhom kienu bbażati fuq il-fatt li Aquilina beda jesperjenza delużjonijiet u emozzjonijiet fl-imġieba tiegħu. Dan apparti l-mod kif iddeskriva l-omiċidju u l-istorja tiegħu ta' abbuż minn droga u sustanzi.
Huma qalu li Aquilina għadu fi stat ta' psikożi u għadu qed ikollu delużjonijiet qawwijin.
Għalhekk il-Qorti ddeċidiet illi l-akkużat kien fi stat ta' ġenn meta qatel lill-vittma bil-Maġistrat tordna li l-kumpilazzjoni tal-evidenza tinbagħat lill-Avukat Ġenerali li jrid jiddeċiedi jekk isirx dak li jissejjaħ ġurin, li fih ikun determinat kienx fi stat ta' ġenn jew le. Jew inkella l-każ jibqa' għaddej b'mod normali bil-kwistjoni tal-ġenn tiġi deċiża hekk kif ikompli jinstema'.