Raġel ta' 58 sena kien akkużat b'attentat ta' qtil ta' kuġinuh li għandu 74 sena.
L-Ispetturi Keith Arnaud u Roderick Spiteri ressqu lill-akkużat mill-Għarghur quddiem il-Maġistrat Audrey Demicoli u akkużawh b'attentat ta' qtil, li kkawża ġrieħi gravi fuq il-vittma, li kellu fuqu sikkina waqt l-offiża u li kien qed iġorrha f'post pubbliku kif ukoll li hedded illi joqtol lill-vittma.
L-akkużat, allegatament, niffed lill-vittma erba' darbiet waqt argument nhar il-Erbgħa li għaddew dwar ħlas ta' kirja. Il-vittma sofra minn ġrieħi f'ġenbu u f'idu tax-xellug.
Id-difiża qed targumenta li r-raġel kien ipprovokat u kien diġa għamel rapporti qabel lill-pulizija dwar il-vittma. Għalhekk huwa m'ammettiex l-akkużi miġjuba kontrieh.
Jidher illi dan l-inċident inqabad kollu kemm hu fuq kamera CCTV.
Il-Qorti m'aċċettatx it-talba għall-ħelsien mill-arrest u għalissa se jinżamm taħt arrest.