Żewġ irġiel ma ngħatawx il-ħelsen mill-arrest wara li nqabdu fil-fatt telgħin fuq sellum għal ġo residenza privata.
L-akkużati, żewġ Maltin, wieħed ta' 40 sena u ieħor ta' 31 sena qalu li mhumiex ħatja tal-akkużi miġjubin kontrihom.
Huma kienu akkużati b'attentat ta' serq u kompliċità, kif ukoll li huma riċedivi.
Il-Pulizja kienu infurmati b'dak li qed jiġri meta telefonata għarrfithom li raġel kien qed iġib ruħu b'mod suspettuż fuq bejt f'dar fiż-Zejtun.
Jidher illi wieħed mill-akkużat huwa qarib ta' sid id-dar.
Waqt li kien qed jiġi arrestat l-akkużat qal li kien qed jipprova jidħol fid-dar biex jara lil bintu.
Id-difiża talbet li dawn iż-żewġ irġiel jingħataw il-ħelsien mill-arrest, hekk kif l-ebda ħsara ma saret u ma kien hemm ebda prova li dawn kienu qed jippruvaw jisirqu d-dar.
Il-Prosekuzzjoni iżda oġġezzjonat u sostniet li l-ħelsien mill-arrest m'għandux jingħata għax għad iridu jixhdu persuni fil-Qorti li huma magħrufin sew mal-akkużati.
Deheru għall-akkużati l-avukati Franco Debono u Marion Camilleri.