Charlotte Zammit ta’ 37 minn Ħal Tarxien baqgħet miżmuma arrestata wara li tressqet il-Qorti akkużata li serqet flus minn diversi pompi tal-petrol madwar Malta fosthom fir-Raħal Ġdid, Ħaż-Żabbar, Attard, Ħal Qormi, San Pawl il-Baħar u l-Mellieħa.
Zammit hi omm Liam Debono li attwalment jinsab mixli bl-attentat ta’ qtil tal-Pulizija, Simon Schembri.
Quddiem il-Maġistrat Neville Camilleri l-mara wieġbet ħatja għall-akkużi miġjuba kontriha.
Fis-sottomissjonijiet l-avukat ta’ għajnuna legali Josette Sultana qalet li l-mara ammettiet l-akkużi fi stadju bikri. “Hija tbati mill-problema tad-droga u trid tirriabilta ruħha u għalhekk il-Qorti għandha tkun aktar ħanina magħha,” qalet l-avukat.
Finalment il-qorti aġġornat għall-ġimgħa d-dieħla bil-mara tinżamm taħt arrest.
Kienet din il-gazzetta li żvelat illi omm Debono f’numru ta’ okkażjonijiet talbitu biex iwassalha d-Detox ħalli tkun tista’ tieħu l-methadone, minħabba li kienet tagħmel użu mill-eroina. Dan anke jekk Debono kien u għadu taħt l-età u allura ma jistax isuq.