Malta hija fost erba’ stati membri tal-Unjoni Ewropea li ma ffirmatx sabiex tingħaqad fi ħdan tribunal speċjali li għandu l-għan li jipproċedi kontra l-President Russu Vladimir Putin għal delitti ta’ aggressjoni fil-konfront tal-Ukrajna.
Madankollu, l-assenza ta’ Malta mill-kompożizzjoni tat-tribunal hija b'riżultat tal-fatt li l-Parlament Malti se jibqa' xolt sakemm issir l-elezzjoni ġenerali li jmiss, peress li s-sħubija trid tiġi ratifikata mill-parlament.
It-tribunal internazzjonali l-ġdid; li twaqqaf biex jitniedu proċeduri kontra r-Russja għall-invażjoni tagħha tal-Ukrajna; ġie deskritt mill-Ministru tal-Affarijiet Barranin tal-Ukrajna bħala avvanz kbir fit-tfittxija għall-ġustizzja.
Id-Deputat Prim Ministru Ian Borg qal lil MaltaToday li l-Kabinett approva l-parteċipazzjoni ta’ Malta fit-tribunal iżda l-mossa kienet teħtieġ approvazzjoni parlamentari. "Sabiex Malta tirratifika l-ftehim neħtieġu l-approvazzjoni parlamentari u l-parlament bħalissa mhuwiex jitlaqqa' minħabba l-elezzjoni," qal Borg.
F’Ġunju li għadda, Borg, fil-kapaċità tiegħu bħala President tal-Kumitat tal-Ministri tal-Kunsill tal-Ewropa, ippresieda l-iffirmar ta’ ftehim storiku li jistabbilixxi t-tribunal.
Borg kien qal li kien onorat ħafna li dan il-pass kien qiegħed jittieħed taħt il-presidenza ta’ Malta.
It-tribunal, li se jkun ibbażat f’The Hague, kiseb appoġġ minn 36 pajjiż, ħafna minnhom Ewropej. L-inizjattiva ġiet ikkonfermata uffiċjalment waqt il-laqgħa annwali tal-Ministri tal-Affarijiet Barranin tal-Kunsill tal-Ewropa.
Matul il-laqgħa, il-ministri approvaw riżoluzzjoni li tiddeskrivi kif se jopera t-tribunal. Huwa maħsub li kumitat se jissorvelja l-funzjonijiet tiegħu, inkluż il-ħatra ta’ mħallfin u prosekuturi, l-approvazzjoni tal-baġits u l-istabbiliment ta’ regoli interni. Il-pajjiżi parteċipanti wiegħdu wkoll li jipproteġu l-indipendenza tal-proċess legali.
Dan it-tribunal ġie mqabbel mal-proċessi ta’ Nuremberg ta’ wara t-Tieni Gwerra Dinjija, li fihom ġew ipproċeduti esponenti tar-reġim Nażist tal-Ġermanja.
Il-ftehim ġie ffirmat minn pajjiżi Ewropej, fosthom ir-Renju Unit, Franza, il-Ġermanja, l-Italja, l-Olanda u l-Ukrajna. Sadanittant, l-Awstralja u l-Kosta Rika huma l-uniċi pajjiżi parteċipanti li mhumiexEwropej.
Malta, il-Bulgarija, l-Ungerija, u s-Slovakkja għadhom ma ffirmawx ir-riżoluzzjoni.
Pajjiżi oħrajn għadhom jistgħu jingħaqdu mat-tribunal fiż-żmien qarib.
.png)
.png)
