Stefan Zrinzo Azzopardi jikkonferma li mhux se jikkontesta l-elezzjoni ġenerali li jmiss

Il-Ministru għall-Fondi Ewropej Stefan Zrinzo Azzopardi mhux se jikkontesta l-elezzjoni ġenerali li jmiss, u qal li jixtieq jagħti aktar ħin lill-familja tiegħu u jirritorna għall-professjoni tiegħu fil-liġi.

F’kommunikat lil ILLUM u l-gazzetta oħt, MaltaToday, Zrinzo Azzopardi qal: “Bħalissa, il-fokus tiegħi huwa li nwettaq id-dmirijiet ministerjali li ġew fdata fija mill-Prim Ministru Abela. Nikkonferma li infurmajtu li mhux se nikkontesta l-elezzjoni ġenerali li jmiss sabiex nagħti aktar ħin lill-familja tiegħi u nirritorna għall-professjoni tiegħi. Se nkompli noffri s-servizzi tiegħi lill-Partit Laburista kif għamilt matul dawn l-aħħar 30 sena.”

Zrinzo Azzopardi għandu karriera twila fil-Partit Laburista. Fl-2003, sar president tal-partit u mexxa riformi interni. Wara r-rebħa tal-Labour fl-2013, ġie maħtur chairman tal-Korporazzjoni għar-Riġenerazzjoni tal-Port il-Kbir.

Zrinzo Azzopardi ġie elett għall-ewwel darba fil-Parlament fl-2017 għad-5 Distrett. F’Jannar tal-2020, inħatar Segretarju Parlamentari għall-Fondi Ewropej taħt il-Prim Ministru Robert Abela, kariga li żamm sa l-2022.

Fl-2022, wara li ġie elett mill-ġdid, sar Ministru tax-Xogħlijiet Pubbliċi u l-Ippjanar. Matul it-tmexxija tiegħu, introduċa liċenzjar għall-kuntratturi u standards regolatorji aktar b’saħħithom għad-demolizzjoni u l-kostruzzjoni.

F’Mejju tal-2025, wara tibdil fil-kabinett, irritorna għall-fondi tal-UE.