Andrea Prudente, il-mara Amerikana li fetħet proċeduri kontra l-Istat Malti meta kienet imċaħħda milli ttemm tqala li ma kinitx vijabbli, qatt ma kienet f’riskju li titlef ħajjitha.
The Times of Malta rrapportat li din kienet il-pożizzjoni tal-Istat Malti li qed jiddefendi lilu nnifsu quddiem il-Qorti Kostituzzjonali. Prudente qed tisħaq li meta t-tobba Maltin irrifjutaw li jtemmulha t-tqala, dawn kienu qed jiksru d-drittijiet fundamentali tagħha.
Il-każ seħħ f’Ġunju li għadda meta Prudente bdiet titlef ħafna demm u t-tobba qalulha li t-tqala ma kinitx se tirnexxi. Prudente kienet Malta għal btala.
Malta spiċċat tiġbed l-attenzjoni tal-midja internazzjonali għax Prudente kellha tmur Spanja biex tabbortixxi t-tarbija. Prudente qed tisħaq li Malta ma offriet l-ebda sigurtà għal ħajjitha.
Għal Prudente, f’dan il-każ qed tidher Lara Dimitrijevic, Avukata u attivista favur id-drittijiet tan-nisa u anke l-abort.
L-Avukat tal-Istat, Chris Soler qed jinsisti li Prudente qatt ma kienet fil-periklu li titlef ħajjitha meta kienet Mater Dei u li t-tobba għamlu min kollox biex jgħinuha u tawha l-kura kollha possibbli.
Kien dan il-każ li wassal biex il-Gvern iressaq emendi quddiem il-Parlament biex kemm it-tobba u anke l-ommijiet ikunu protetti jekk jiddeċiedu li jtemmu t-tqala f’każ li s-saħħa tal-omm tkun fil-periklu.
Aqra wkoll: