Il-Prim Ministru Robert Abela qal illi akkużi ta' ismijiet ta' kandidati għat-test tas-sewqan li kienu qrib Ministru jew ta' Kastilja u li allegatament kienu qed jiġu imbuttati 'il quddiem biex jgħaddu mit-test, hija biss "xniegħa."
Dan wara li lbieraħ kompliet il-kumpilazzjoni tax-xhieda fil-każ ta' allegat korruzzjoni kontra tliet uffiċjali ta' Transport Malta - Clint Mansueto, l-eks Kunsillier Laburista Philip Edrick Zammit u Raul Antonio Pace. Ilbieraħ xehedu tliet eżaminaturi b'wieħed jgħid kif Mansueto kien iħeġġiħhom biex imexxu fuq ċerta kandidati u eżaminatur ieħor - Mark Tabone - qal illi saħansitra kien hemm okkażjonijiet fejn kienu jintalbu juru aktar ħniena ma' ċerti kandidati għax "ikollhom rabta mal-Ministru jew ma' Kastilja."
Il-Prim Ministru Abela mistoqsi minn The Times of Malta qal illi dan ix-xhud kien qed jgħid x'qallu xi ħadd u reġa' fakkar li ma hemm ebda investigazzjoni għaddejja fuq Ministri tal-Kabinett. Huwa fakkar ukoll li l-akkużi jitrattaw reati li allegatament ġraw tliet snin ilu, meta hu kien għadu mhux Prim Ministru.
"Huwa qal li xi ħadd qallu illi kien hemm xi telefonati minn Kastilja. U dak huwa li allegatament ġara qabel ma jien sirt Prim Ministru," temm jgħid Abela.