'Il-faqar qiegħed jiżdied;' Aktar Maltin jirrikorru għand il-foodbanks u l-parroċċi għall-ikel

Iż-żieda fil-prezzijiet, b’mod partikolari tal-aktar affarijiet bażiċi u essenzjali hija t-tema fuq fomm kulħadd, aktar u aktar għax hemm individwi li qed jispiċċaw darahom mal-ħajt tant li qed jiżdiedu dawk il-familji li qed ikollhom iduru fuq entitajiet u organizzazzjonijiet biex jgħinuhom, saħansitra biex jieklu.

Matul din il-ġimgħa, il-gazzetta tkellmet ma’ persuni li jmissu b’idejhom ta’ kuljum din ir-realtà, inkluż persuni li jaħdmu f’foodbanks, entitajiet li joffru appoġġ u saħansitra ma’ parroċċi. Il-Maltin li qed jirrikorru għall-għajnuna qed jiżdiedu u l-ikliet li qed iqassmu qed isiru dejjem aktar għolja.

“Il-faqar żdied. Aktar individwi u familji qed jispiċċaw darahom mal-ħajt,” saħaq Patri Hilary Tagliaferro li jmexxi l-Millenium Chapel fil-qalba ta’ Paceville. 

Għal min jaħseb li l-faqar qed jolqot biss lill-barranin sejjer żbaljat ukoll, b’Patri Hilary jikkonferma mal-ILLUM li l-maġġoranza tal-persuni li jmorru għall-għajnuna, għax mhux iħallqu biex jagħmlu xirja ikel, jixtru l-mediċini jew iħallsu l-kera, huma Maltin.

“Hemm diversi fatturi li wasslu biex jiżdied il-faqar u biex aktar persuni jersqu għandna għall-għajnuna. L-ewwel nett hemm iż-żieda fil-prezzijiet tal-prodotti essenzjali li qed tinħass. Imbagħad hemm il-mediċini li għolew ħafna wkoll. Fl-aħħar nett jibqgħu jiżdiedu wkoll il-prezzijiet tal-kirjiet. Dawn huma tliet morsi li qed jagħfsu fuq il-familji, l-aktar dawk bi dħul baxx,” insista.

Patri Hilary Tagliaferro

Patri Hilary Tagliaferro qal ukoll mal-ILLUM li żdiedu wkoll dawk il-persuni li ma għandhomx saqaf fuq rashom. 

“Ma nafx kif qed naċċettaw li 300 ruħ jorqdu barra. Iva hawn 300 ruħ żgur bla dar. Id-djar li jilqgħu n-nies bla saqaf fuq rashom, huma mimlija. Ejja hawn bil-lejl u ara n-nies rieqda fuq il-bajjiet. Ħdejna jkun hawn tliet persuni oħra rieqda barra.”

Fakkar kif il-Millenium Chapel għandha wkoll Foodbank u bħalissa qed toffri xejn inqas minn ikla lil 200 familja darba fix-xahar.

“Nagħtuhom xirja tajba. Nagħtuhom l-aktar affarijiet importanti u bażiċi. Tkun tiswa mal-€50,” insista Patri Hillary. 

Ovvjament, l-ispejjeż u l-prezzijiet għolew għal kulħadd, b’Patri Hillary jikkonferma li anke huma qed ibatu minħabba l-inflazzjoni.

Madanakollu rringrazzja lil diversi kumpaniji li fi kliemu jagħtu donazzjonijiet kbar, anke ta’ ikel u lil diversi individwi li jibqgħu jkunu ta’ sostenn għalihom.

‘Wara l-pandemija l-familji li jkollhom bżonn l-ikel baqgħu ħafna’

Il-gazzetta ILLUM tkellmet ukoll ma’ Barbara Caruana, Manager tal-Foodbank Lifeline Foundation li spjegat kif minkejja li ħasbu li wara l-pandemija n-numru ta’ familji li kienu qed jgħinu se jonqos, fil-verità n-numru baqa’ għoli meta mqabbel ma’ kemm kienu jgħinu familji qabel feġġ il-Covid-19.

Fil-fatt, Caruana spjegat kif qabel feġġet il-pandemija, kienu jgħinu madwar 100 familja fil-ġimgħa. Fl-eqqel tal-pandemija ġieli kienu qed joffru xirja lil 600 familja fil-ġimgħa.

“Ħsibna li n-numri se jerġgħu jinżlu, imma preżentament għadna qed ngħinu 300 familja fil-ġimgħa,” qalet Caruana.

Li tagħmel din il-Fondazzjoni huwa li tgħin lil dawn il-familji sakemm jerġgħu jqumu fuq saqajhom. Min imur għandhom, iqabbduh minnufih mal-ħaddiema soċjali għax l-għan tagħhom huwa dejjem li dawn il-familji jingħataw l-appoġġ kollu meħtieġ biex eventwalment ifendu għal rashom. Diversi familji jkunu riferuti għandhom ukoll mingħand diversi għaqdiet, entitajiet u NGOs.

Caruana spjega kif il-Fondazzjoni tipprovdi xirja kull ġimgħa lil dawn il-familji għal sitt ġimgħat. Jekk wara sitt xhur ikunu għadhom ma jifilħux, jibqgħu joffrulhom ix-xirja għal sitt ġimgħat oħra u hekk jiġri għat-tielet darba jekk il-familja tibqa’ daharha mal-ħajt.

F’din ix-xirja, il-Fondazzjoni toffri biżżejjed ikel għal ġimgħa, biex il-familja tiekol kolazzjon, l-ikla ta’ nofsinhar u dik ta’ filgħaxija.

Mistoqsija jekk bħala Fondazzjoni hux tħoss ukoll il-piż tal-inflazzjoni, anke għax trid taħżen l-ikel, Caruana wieġbet fil-pożittiv anke għax wara kollox għola l-prezz tal-aktar ikel bażiku li huma jqassmu. 

“Illum baskett ikel qed jiswina aktar. Konxji ta’ dan,” insistiet. “Qed nonfqu aktar.”

Madanakollu, fejn jidħlu d-donazzjonijiet, Caruana ma setatx tindika x’inhi s-sitwazzjoni, anke għax il-maġġoranza tad-donazzjonijiet jirċevuhom fi żmien il-Milied.

Tittama biss li f’Diċembru li ġej (u mhux biss) id-donazzjonijiet jibqgħu b’saħħithom biex ikunu jistgħu jkomplu bis-servizz tagħhom u jlaħħqu mad-domanda.

‘In-nies li qed jitolbu l-għajnuna żdiedu! Hawn nies li qed iħossu l-piż’

Bla dubju ta’ xejn, il-parroċċi u allura l-kappillani huma fost l-aktar viċin il-familji fil-komunitajiet Maltin u l-Għawdxin u għalhekk li l-ILLUM tkellmet magħhom ukoll.

Dun Mark Andre Camilleri, Kappillan ta’ Raħal Ġdid ikkonferma mal-ILLUM li fl-aħħar xhur u ġimgħat kienu ħafna dawk il-familji u individwi li ressqu lejn il-parroċċa jitolbu l-għajnuna għax ma jistgħux ilaħħqu mal-ħajja.

Voluntiera tal-Fondazzjoni Foodbank Lifeline jippakjaw ix-xirjiet

“Dalgħodu stess ġiet koppja żagħżugħa li għadhom kemm kellhom tewmin. Ikollok wild wieħed ukoll ħafna spejjeż aħseb u ara kollox doppju. Ma jistgħux ilaħħqu,” insista l-Kappillan. “Hawn min qed jinqeda, imma hawn nies li l-inflazzjoni qed iħossuha.”

Camilleri saħaq li anke jekk ftit li xejn jista’ jsir, il-parroċċa qed tipprova tagħmel l-almu kollu tagħha, anke permezz ta’ servizz ta’ ħaddiema soċjali li qed toffri lil dawn il-familji, bil-għan li jkunu mgħejjuna wkoll iqassmu flushom aħjar u anke jirċievu taħriġ biex isibu mpjieg aħjar.

‘Jiġu wkoll ħafna barranin sfruttati”

Apparti l-Maltin, Dun Mark tkellem ukoll fuq ħafna barranin li jgħixu fil-parroċċa tiegħu u li jkunu sfruttati minn dawk li jħaddmuhom.

“Jiġu għandi barranin li daqqa jkunu xogħol u daqqa le għax ma jkunx fiss. Oħrajn li jaħdmu, mingħalihom se jaqilgħu l-paga, jasal l-aħħar tax-xahar u min iħaddimhom ma jħallashomx. Hemm min qed ikun sfruttat u għax ikunu bla dokumenti, ma jkunux jistgħu jirraportaw,” saħaq il-Kappillan.

‘Qed inqassam 180 kull xahar’

L-ILLUM tkellmet ukoll mal-Arċipriet tal-Parroċċa ta’ Bormla, Dun Anton Cassar li wkoll innota żieda, anke jekk fi kliemu mhux esaġerata, ta’ nies li minħabba ż-żieda fil-prezzijiet, sabu darhom mal-ħajt u kellhom iduru fuq il-parroċċa għall-għajnuna.

Fil-fatt, Dun Anton spjega kif preżentament, il-parroċċa Bormliża qed tqassam xejn inqas minn 180 xirja fix-xahar lil dawn il-persuni u l-familji.

“Il-parroċċa qed toffri xirja mdaqqsa lil dawn il-persuni,” kompla l-Arċipriet.

Mistoqsi jekk dawk li qed jitolbu l-għajnuna humiex Maltin, l-Arċipriet wieġeb fil-pożittiv u saħaq li kważi ħadd minn dawk li dahru fuq il-parroċċa ma huma barranin.

Hemm aktar parroċċi li qed joffru dawn ix-xirjiet. Fost dawn, l-ILLUM tkellmet mal-Kappillan tal-Parroċċa Dumnikana tal-Belt, Patri Michael Camilleri O.P, li stqarr kif anke jekk ma nnotax xi żieda fit-talbiet għall-għajnuna, madanakollu l-parroċċa toffri mat-80 xirja fix-xahar lil familji Maltin li mhux ilaħħqu mal-ispejjeż.