'Tħallux il-flus jieħdu f'idhom il-poter reali tal-Istat' - L-Arċisqof lid-Deputati l-ġodda

L-Arċisqof ta’ Malta Charles Scicluna appella lill-politiċi, li llum ħadu l-ġurament bħala Deputati Parlamentari, biex l-azzjonijiet tagħhom ma jkunux imqanqla biss minn urġenza, imma appella biex iħarsu fit-tul u jindirizza l-għerq tat-tbatija u jindirizzawha. Appella wkoll biex jaħdmu sabiex jissuperaw il-mentalità tribali u biex ma jħallux il-flus jieħdu f'idhom il-poter tal-Istat. 

“Il-karita politika tidher ukoll f’qalb miftuħa għal kulħadd,” ikkwota l-Arċisqof lill-Papa. “Ħuti, din il-kelma tal-Papa naraha kelma li tagħmlilna kuraġġ biex nissuperaw il-mentalità tribali — aħna u intom, huma u aħna — u mhux se nagħmluha f’ġurnata. Nispera nilħqu nagħmluha f’seklu imma aħna hemm bżonn naħdmu issa f’ħajjitna, jiena magħkom.”

Monsinjur Scicluna qal dan waqt l-omelija tiegħu waqt il-Quddiesa tal-Ispirtu s-Santu fil-Kon Katidral ta’ San Ġwann li tat bidu għaċ-ċerimonju tal-ftuħ tal-Parlament Malti għall-14-il leġislatura.

L-Arċisqof silet ir-riflessjoni kollha tiegħu mill-Enċiklika tal-Papa Franġisku Ilkoll Aħwa u anke mid-diskorsi li hu għamel ftit tal-ġimgħat ilu meta żar Malta.

Fakkar li f’din l-ittra tiegħu, l-Papa jiddistingwi bejn imħabba imqanqla minn urġenza, bħal meta xi ħadd iħossu ħażin ft-triq u ħaddieħor imur jgħinu u dik li l-Papa jsejħilha “tjubija ordnata.”

Hi karità li toqgħod qrib ta’ persuna li qed tbati, u hi karità wkoll dak kollu li tagħmel, anki mingħajr ma jkollok kuntatt dirett ma’ dik il-persuna, biex tibdel il-kundizzjonijiet soċjali li qed jikkawżaw it-tbatija tagħha,” ikkwota l-Arċisqof.

Kien hawn li saħaq li jekk is-Samaritan it-Tajjeb ra l-urġenza u l-emerġenza u rrisponda mill-ewwel, il-politiku jrid jaħseb fit-tul, lejn l-għerq tal-problema u jindirizzaha.

Ritratt ta' James Bianchi (MediaToday)

Insista li hija karità wkoll, anzi forma ogħla ta’ kwalità dik li ssir minn xi ħadd li ma jkollux kuntatt dirett mal-persuna. Ta dawn iż-żewġ eżempji li jsemmi l-Papa:

“Jekk xi ħadd jgħin anzjan jaqsam xmara – u din hi karità mill-aqwa – il-politiku jibnilu pont, u anki din hi karità. Jekk xi ħadd jgħin lil ieħor billi jagħtih x’jiekol, il-politiku joħloq għalih post tax-xogħol, u hekk ikun iħarreġ għamla l-aktar għolja ta’ karità li tagħmel l-azzjoni politika tiegħu waħda tassew nobbli,” insista l-Papa.

Irrefera wkoll għaż-Żjara tal-Papa Franġisku f’Malta u d-diskors b’saħħtu li hu għamel lill-awtoritajiet tal-pajjiż fil-Palazz tal-Gran Mastru ftit wara li rifes fuq gżiritna.

Fakkar li l-Papa talab biex Malta tkun verament laboratorju ta’ ġustizzja soċjali, ta’ paċi soċjali. Talab ukoll biex l-impenn biex tintemm l-illegalità u l-korruzzjoni jkun qawwi "bħal dak ir-riħ li jonfoħ u jnaddaf il-kosta."

“L-onestà, il-ġustizzja, is-sens tad-dmir u t-trasparenza huma pilastri essenzjali ta’ soċjetà ċivilment avvanzata,” qal l-Arċisqof waqt li kompla jikkwota lill-Papa.

Insista li anke jekk illum il-politika saret kelma kerha, minħabba żbalji, korruzzjoni u ineffiċjenza ta’ xi politiċi, jibqa’ l-fatt li d-dinja ma tistax tiffunzjona mingħajr politika ġusta.

“Għandna bżonn il-politika u għandna bżonn partiti politiċi magħmula min-nies determinati li jwettqu u jagħmlu xi ħaġa,” insista l-Arċisqof.

Kompla jikkwota lill-Papa u saħaq li politika tajba hija dik li ma tħallix l-ekonomija tieħu f’idha l-poter reali tal-isptar, jiġifieri l-flus ma jistgħux jiġu qabel kollox.

Saħaq li l-mistoqsijiet li jistaqsu l-politiċi ma għandhomx ikunu fuq kemm ġabu voti u kemm qala’ ċapċip imma kemm poġġa imħabba fil-proġetti tiegħu, kemm għen biex il-poplu jimxi ‘l quddiem, x’marka ħalla fuq is-soċjetà u kemm żera paċi.

Temm jawgura lill-politiċi kollha u ħeġġiġhom biex il-ħidma tagħhom tkun espressjoni tal-imħabba politika li xandar il-Papa Franġisku.