Aktar kmieni illum il-Kummissjoni Elettoral irċeviet id-dikjarazzjoni ta' interess għall-kariga tal-Kap ta' Partit, minn Bernard Grech. Hekk kif nhar il-Ħadd, mill-Kunsill Ġenerali tal-PN skatta l-proċess għall-elezzjoni għall-Kap tal-PN.
Sa' issa kollox jindika li dan se jkun qiegħed itellaq waħdu. Madankollu, id-dikjarazzjoni ta' interess għal Kap se jibqgħu jiġu aċċettati sa nhar is-Sibt 30 ta' April f'12pm.
Fl-indirizz tiegħu lid-delegati tal-PN nhar il-Ħadd li għadda, Grech saħaq li jekk l-azzjonijiet tiegħu ma jwasslux lill-PN biex jirbaħ it-tielet siġġu fil-Parlament Ewropew, se jkun qed jerġa' jitlob vot fuq it-tmexxija tiegħu. Fil-fatt il-PN, minkejja li daħħal lill-Malta fl-Unjoni Ewropea qatt ma rebaħ l-elezzjonijiet tal-Parlament Ewropew.
Fid-diskors, tiegħu Grech ikkonferma l-istorja tal-gazzetta ILLUM, jiġifieri li l-PN għandu dejn ta' €32 miljun. Huwa qal li mhux faċli li tmexxi partit u tieħu deċiżjonijiet u tispiċċa b'idejk dejjem marbuta minħabba l-limitazzjonijiet finanzjarja tal-PN. Grech saħansitra qal li l-PN m'għandux biżżejjed flus biex imexxi kampanja elettorali oħra għall-elezzjoni tal-Parlament Ewropew u l-kunsilli lokali, li se jsiru sentejn oħra.
Din l-elezzjoni interna trid issir skont l-istatut tal-PN wara telfa elettorali, bħal dik tas-26 ta' Marzu.