Iċ-Chairperson tal-ONE u anke tal-Aġenzija Kulturali għall-Belt Valletta, Jason Micallef, ħadha qatta bla ħabel kontra t-tfittxija li saret ilbieraħ fid-dar tal-eks Prim Ministru Joseph Muscat u saħansitra staqsa jekk il-Pulizija u awtoritajiet oħra hux qed jaħdmu għax "bullied" minn ftit nies.
Fuq Facebook, Micallef iddeskriva lil Muscat bħala "wieħed minna" u saħansitra ddeskriva dak li seħħ ilbieraħ bħala "assalt fuqu" mill-Pulizija.
"Il-mument li nsemmgħu leħinna wasal," insista Micallef waqt li saħaq li r-rejd li sar ilbieraħ kienet "oxxenita kbira"
Staqsa kif kien hemm membri tal-midja li kienu jafu x'se jsir u kienu fuq il-post u talab lill-Kummissarju biex jinvestiga dan.
Ħadha wkoll kontra l-Pulizija għax fost affarijiet oħra, ikkonfiskaw il-mowbajls taż-żewġt itfal ta' Muscat, xi ħaġa li kkritika wkoll il-Prim Ministru lbieraħ.
"L-istituzzjonijiet iridu jaħdmu, iżda għajb kbir jekk l-istituzzjonijiet jaħdmu ghax iħossuwhom "bullied" minn ftit tużżani nies ġo għaqda maħlufa li tagħmel ħsara kemm tiflaħ lill-Gvern Laburista, lill-Mexxejja tiegħu, lill-eks Mexxejja tiegħu, u lil kulmin b'xi mod jew iehor hu assoċjat mal-Partit Laburista," kiteb Micallef.
Kien hawn li sejjaħ lil-Laburisti biex iqumu u jgħixu "issa daqshekk, issa żżejjed," għax fi kliemu ma jiflaħx aktar jara tfixkil kontra l-Gvern.
"It-teatrin li fuq il-familja Muscat mhux aċċettabbli. Joseph Muscat hu wieħed minna. Kif seħħ, kif magħmul, kien mibni fuq pjan li jimbarazza lill-Gvern Laburista, u biex joħloq tensjoni żejda ftit xhur 'il bogħod minn elezzjoni ġenerali," saħaq.
Saħansitra saħaq li dan huwa ż-żmien li l-Laburisti joħorġu jsemmgħu leħinhom fit-toroq.