Il-kumpanija 3City Design Limited, kumpanija tal-mara tal-eks Chief of Staff, Keith Schembri, rat eluf ta’ ewro trasferiti għandha mingħand Adrian Hillman, Allied Newspapers u Schembri nnifsu.
Dan ħareġ fil-Qorti dalgħodu hekk kif kompliet il-kumpilazzjoni tal-evidenza kontra Josette Vella Schembri, akkużata b’ħasil ta’ flus.
L-Ispettur Leanne Bonello qalet li l-kumpanija ta’ Schembri kienet tagħmel parti minn skema kumplessa li kienet użata biex ikunu trasferiti eluf ta’ ewro bejn entitajiet differenti.
Spjegat ukoll li l-kumpanija 3City Design twaqqfet fl-2008, jiġifieri fl-istess sena li fiha sar l-ewwel ftehim bejn Kasco u l-Allied Newspapers għax-xiri ta’ apparat tal-istampar.
Bonello qalet li l-eks Direttur Maniġerjali tal-Allied Newspapers, Adrian Hillan trasferixxa madwar €14,000 għal għand 3City Design.
Vella Schembri kienet qalet lill-Pulizija li hi kienet offriet servizzi ta’ “interior design” għad-dar ta’ Hillman. Minkejja dan, Vella Schembri ma pprovdiet l-ebda dokumentazzjoni biex turi dan.
Apparti minn hekk, żewġha Keith Schembri trasferixxa €57,784.16 fi tliet tranżazzjonijiet. Anke hawn l-ebda dokumentazzjoni ma kienet ippreżentata.
Eventwalment, Robert Zammit u Malcom Scerri, sħab Keith Schembri fin-negozju, irċevew eluf mingħand il-kumpanija 3City Design.
Scerri kien jirċievi pagament kull xahar li kollha kemm huma f’salt jammontaw għal €44,289.75. Skont Vella Schembri, dawn kienu jkopru xogħol li Scerri għamel għall-kumpanija iżda anke din id-darba ma pprovdiet l-ebda dokumentazzjoni biex turi dan.
Somom sostanzjali ta’ flus daħlu f’din il-kumpanija mingħand Allied Newspapers.
