Cutajar kostrett iħassar kumment li fih ipprova 'jiġġustifika' attakk fuq Somalu f'Għawdex
Fil-post oriġinali, Cutajar qal li dan l-attakk huwa riżultat ta' taħlit ta' kulturi li seħħ mgħaġġel u li Għawdex ma kienx lest għalih
minn Yendrick Cioffi
Id-Deputat Nazzjonalista Kevin Cutajar neħħa, minn fuq Facebook, post li kiteb aktar qabel u li fih, kważi kważi, iġġustifika attakk fuq raġel Somalu billi tefa’ l-ħtija fuq “it-taħlit mgħaġġel tal-kulturi.”
Il-każ seħħ ilbieraħ meta grupp ta’ rġiel, allegatament, ħebbew għas-Somalu u tefgħuh il-baħar, fl-Imġarr Għawdex.
Cutajar ikkundanna dan l-inċident, iżda fl-istess ħin tefa’ l-ħtija fuq dak li hu sejjaħlu bħala “taħlit mgħaġġel ta’ kulturi li Għawdex ma kienx lest għalih.”
Dan ma niżel tajjeb xejn tant li kienu bosta dawk li kkummentaw fuq il-midja soċjali. Kien għalhekk li d-Deputat kien kostrett iħassar dan il-post u ftit wara jtella’ ieħor biex jipprova jfiehem dak li qal qabel.
“Nirrepeti li jien kontra dak li ġara u biex żgur inkunu ċari nikkundannah bla riservi.
Li pruvajt ngħid u li sfortunatament ġie misinterpretat, hu li dak li ġara l-bieraħ qed jurina r-realtà li mhijiex sabiħa tan-nuqqas tal-inklużjoni soċjali,” kiteb Cutajar.
Intant, mistoqsi jekk dan il-kumment kienx aċċettabbli għall-Kap tal-Oppożizzjoni Bernard Grech, kelliem għall-Kap Nazzjonalista qal li d-Deputat kien mifthiem ħażin u rrefera lill-midja għall-ispjegazzjoni tal-istess Cutajar fuq Facebook.
Intant, il-Pulizija kkonfermat li żagħżugħ ta’ 21 sena se jkun qed jitressaq il-Qorti b’rabta ma’ dan il-każ.
Persuna li kienet fuq il-post spjegat kif “grupp ta’ 15-il raġel,” ħeġġew għal dan is-Somalu u qabdu jagħtuh u ma ħallewhx jitkellem jew jispjega ruħu. Kien hawn li skont l-istess persuna, żagħżugħ, quddiem grupp akbar ta’ rġiel iċapċpuli, waddab lis-Somalu l-baħar u spiċċa ħabar wiċċu ma dgħajsa.
