Il-Kap tal-Oppożizzjoni Bernard Grech kiteb lit-Task Force għall-Azzjoni Finanzjarja (FATF), wara rapporti li Malta tista' titpoġġa fil-lista l-griża minn dan il-grupp li jiġġieled il-ħasil tal-flus.
Grech wiegħed li Gvern ġdid nazzjonali jaħdem biex isewwi r-reputazzjoni ta' Malta.
Il-protokolli u r-regoli ta’ Malta biex tiġġieled kontra l-ħasil tal-flu ġew evalwati mill-FATF wara ġimgħat sħaħ ta’ investigazzjoni minn osservatuti internazzjonali.
Il-Grupp għall-Kooperazzjoni Internazzjonali tal-FATF analizza r-regoli li għandha Malta wara l-assessjar riċenti li sar mill-Moneyval. Ibbażat fuq dan ir-rapport, il-FATF se jkun qed jiddeċiedi jekk Malta għandhiex tispiċċa fuq il-lista l-griża.
Grech qal lil FATF li l-industrija tas-servizzi finanzjarji f'Malta għamlet "investiment sostanzjali u tanġibbli biex tkun konformi ma' miżuri ta' mitigazzjoni kontra l-ħasil tal-flus. Insista li dawn jinsabu d-diżappuntanti "bl-aġir tal-ftit li setgħu kienu jafu aħjar."
Il-Kap tal-Oppożizzjoni, fuq Facebook, esprima wkoll id-diżappunt tiegħu wara li skont rapporti mhux ikkonfermati, l-Istati Uniti, ir-Renju Unit u l-Ġermanja ħadu pożizzjoni kontra Malta.
"Insista li din hija kwistjoni ta' importanza nazzjonali u jista' jkollha impatt negattiv bla preċedent fuq is-servizzi finanzjarji f'Malta, l-industrija tal-gamin u oħrajn," saħaq Grech.
'Jekk dan il-proċess tekniku jiġi mnawwar minn motivi politiċi ulterjuri, l-eżitu se jkun kaxxa magħluqa'
Intant, fuq Facebook, il-Ministru għall-Finanzi Clyde Caruana saħaq li jekk dan il-proċess tekniku jiġi mnawwar minn motivi politiċi ulterjuri, l-eżitu se jkun kaxxa magħluqa.
Caruana saħaq li ġie kkuntattjat minn diversi ġurnali fuq dak li għaddej.
"Kif għidt ftit tal-ġimgħat ilu, pajjiżna għadda mill-punti kollha fl-eżami tekniku tal-Moneyval. Bħalissa għaddejja d-diskussjoni dwar dan ir-rapport fl-FATF. Jekk nimxu biss bil-ħsieb loġiku li pajjiż jgħaddi abbażi ta’ dan l-eżerċizzju, Malta se tgħaddi," saħaq Caruana.
Madanakollu saħaq li jekk jidħlu motivi politiċi li jweħħlu lil Malta, dan ma jkunx ġust max-xogħol serju li qed isir u sar matul din l-aħħar sena u nofs
"Minkejja ċ-ċokon tagħna, dan jibqa’ Stat sovran li għandu identità, bandiera u innu. Kif pajjiżi oħra jħarsu l-interessi tagħhom, aħna wkoll inkunu qed nieħdu l-passi kollha biex inħarsu l-interessi ta’ pajjiżna u tal-poplu tagħna," insista Caruana.
