Id-Deputat Nazzjonalista Jason Azzopardi staqsa għaliex il-Ministru fl-Uffiċċju tal-Prim Ministru Carmelo Abela, għadu ma fetaħx proċeduri kriminali kontra Alfred Degiorgio minħabba kalunja.
Azzopardi qal dan l-għada li Abela kien mgħajjat mill-Pulizija biex ikun mistoqsi xi mistoqsijiet wara li Alfred Degiorgio, wieħed mill-irġiel akkużat bil-qtil ta' Daphne Caruana Galizia, semma lil Ministru bħala kompliċi fl-attentat ta' serqa mill-kwartieri tal-HSBC fl-2010.
"Il-liġi kriminali tgħid li: 'Kull min bil-ħsieb li jagħmel ħsara lil xi persuna, jakkuża lil dik il-persuna quddiem awtorità kompetenti b’reat, filwaqt li jkun jaf li dik il-persuna hija innoċenti, għall-fatt biss li jkun akkużaha, jeħel.' Dan huwa d-delitt tal-kalunja," kiteb Azzopardi.
Kien għalhekk li staqsa għaliex il-Ministru, ġaladarba qed jisħaq li Degiorgio qed jigdeb, ma fetaħx proċeduri kriminali kontrih.
"Jekk jiftaħ tali proċeduri, il-Ministru Abela jkun jista' jidher fil-Qorti quddiem l-istess Degiorgio. Jew qed jiddejjaq minn xi ħaġa? Din id-darba fil-Qorti, Degiorgio ma jkunx liebes balaclava," kiteb Azzopardi.
Fuq Facebok, Jason Azzopardi kien allega li l-Ministru kien imwiegħed €300,000 biex jipprovdi lill-ħallelin filmati u anke karti tal-aċċess. Abela qed jiċħad dawn l-akkużi.
F’dak iż-żmien, Abela kien jaħdem il-bank u kellu aċċess għat-tagħmir li bih isiru l-karti tal-aċċess li jkollhom l-impjegati. Il-Ministru kien ikkonferma dan hu stess meta kien qed jixhed fil-kumpilazzjoni tal-evidenza kontra l-ħallelin, lura fl-2011.
Kien Vince Muscat il-Koħħu u aktar tard Alfred Degiorgio li kienu allegaw li “Ministru preżenti” kien kompliċi f’din is-serqa.
Minkejja dan, kien Jason Azzopardi l-ewwel li semma lil Abela b’ismu, u immedjatament, il-Ministru kien fetaħlu libell.
Intant, il-Ħadd li għadda, il-gazzetta oħt MaltaToday irrapportat li l-Pulizija qed jinvestigaw l-allegazzjonijiet li qed isiru fil-konfront ta’ Abela. Abela qed jinsisti li hu mhux qed ikun investigat.
Intant, il-Kap tal-Oppożizzjoni Bernard Grech saħaq li "f'pajjiż normali, meta għandek Ministru fl-Uffiċċju tal-Prim Ministru li qed jiġi interrogat mill-Pulizija dwar allegazzjonijiet fuq każ serju ħafna, dan iwassal biex għall-inqas jiġi sospiż mill-Kabinett sakemm jitlestew l-investigazzjonijiet."
Insista li taħt it-tmexxija ta' Robert Abela, mhux biss ma jsirx hekk imma "għandna skiet itarrax mill-Prim Ministru."
"Il-ballun qiegħed f’saqajn il-Prim Ministru, biex jieħu azzjoni immedjata fuq il-Ministru Abela," insista Grech.