Il-gazzetta ILLUM tinsab infurmata li fil-jiem li ġejjin il-Gvern se jkun qed iħabbar il-pjan tiegħu li jiftaħ diversi istituzzjonijiet, attivitajiet u anke negozji mill-ġdid - iżda b'mod gradwali, fuq medda ta' numru ta' ġimgħat.
Sorsi differenti qalu lil din il-gazzetta illi l-ewwel li se jibdew huma l-iskejjel imbagħad il-ħwienet tal-bejgħ bl-imnut (retail) kif ukoll ħwienet li huma marbutin ma' sbuħija. Dawn iżda se jiftħu taħt regoli u restrizzjonijiet partikolari li jitħabbru mill-Gvern ladarba jiżvela d-dettalji ta' dan il-pjan.
Ir-ristoranti u snack bars, li ingħalqu meta tħabbru l-aħħar sett ta' miżuri u restrizzjonijiet, sa issa ma jidhirx li se jkunu qed jiftħu nhar it-Tnejn 12 ta' April.
Sorsi li tkellmu mal-ILLUM qalu illi qed jikkalkulaw illi jekk l-affarijiet ma jinbidlux u ma jkunx hemm żviluppi partikolari li jirrigwardaw il-Covid-19 - bħal varjanti ġodda, li jikkumplikaw is-sitwazzjoni mill-ġdid - dawn l-istabbilimenti jiftħu aktar tard dan ix-xahar jew inkella kmieni f'Mejju.
Mistoqsijin għaliex l-iskejjel l-ewwel, dawk li tkellmu ma' din il-gazzetta qalu illi l-għeluq tal-iskejjel ġab ħafna probemi, mhux l-inqas dawk relatati mal-kontinwità fit-tagħlim u oħrajn marbutin ma' mijiet ta' ġenituri li ma jistgħux imorru x-xogħol. Fil-fatt għal skema ta' għajnuna tal-Gvern lil dawk il-ġenituri li ma jistgħux imorru x-xogħol minħabba li jridu joqgħodu ma' uliedhom kienu applikaw 1,261 ġenitur sa din il-ġimgħa, ħabbar il-Gvern.
Dawk li tkellmu mal-ILLUM fakkru illi ħafna għalliema issa ngħataw il-vaċċin, apparti li l-vaċċin qed ikompli jinfirex fil-komunità, bin-numru ta' dożi sal-bieraħ jitla' għal ftit inqas minn 210,000 li minnhom kważi 60,000 huma nies li ħadu ż-żewġ dożi.
Rapporti fuq il-midja lokali irrappurtaw kif il-pjan huwa li sas-7 ta' Ġunju li ġej il-poplu kollu ikun ħa imqar l-ewwel doża tal-vaċċin. Il-proċess mistenni jitħaffef ladarba jasal il-vaċċin tal-Johnson&Johnson, li jirrikjedi biss titqiba waħda.
Ladarba jkunu fetħu r-ristoranti u snack bars, imbagħad l-attenzjoni kollha - jgħid l-istess sors - ikun għal Ġunju, f'dak li għandu x'jaqsam ma' avvenimenti ftit ikbar (mhux tal-massa) u turiżmu.
"L-affarijiet għadhom fluwidi fil-verità - imma jidher li dan huwa l-pjan sa issa. Naturalment wieħed irid iżomm f'moħħu r-realtà tal-pandemija u li tagħmel kemm tagħmel pjani, xejn mhu ċert fl-assolut. Nittamaw li ma jkunx hemm problemi sabiex dan il-pjan iseħħ," saħaq is-sors ma' din il-gazzetta.
Il-Gvern, kien ħabbar l-għeluq tal-iskejjel kollha, in-negozji kollha mhux essenzjali u diversi attivitajiet oħrajn wara illi Malta bdiet tiffaċċja numru rekord, fuq ieħor ta' każi ta' Covid-19 - bl-ogħla numru jkun irreġistrat nhar l-10 ta' Marzu b'510 każi, meta Malta kellha 3,185 każ attiv u kienu ingħataw 105,416 tilqima - nofs dawk li ngħataw sa issa. Il-miżuri, li tħabbru dakinhar ukoll, kienu jinkludu l-għeluq tal-gyms, twaqqif ta' viżti l-isptar u anke l-projbizzjoni ta' tiġijiet - għajr għal funzjoni fil-Knisja.
Il-Gvern kien naqqas il-gruppi li jistgħu jkunu flimkien għal erba' familji flimkien, li imbagħad reġa' niżżel għal tnejn.