Il-Kap tal-Partit Nazjzonalista u tal-Oppożizzjoni Bernard Grech qal li l-aħbar tal-lum, dwar is-sid ta' Macbridge, hija konferma tal-korruzzjoni istituzzjonalizzata taħt dan il-Gvern, "konferma li l-assi tal-poplu inbiegħu biex Keith Schembri u Konrad Mizzi jaqilgħu l-miljuni li jpoġġuhom fil-kumpaniji fil-Panama."
Huwa qal li kull fejn kienu mdaħħlin Schembri, Mizzi u anke Joseph Muscat kien hemm il-korruzzjoni u saħaq li jekk il-Prim Ministru jibqa' ċass ikun - skont Grech - kompliċi.
Huwa wera' l-apprezzament tiegħu lejn The Times u lejn il-ġurnalisti kollha b'mod speċjali Daphne Caruana Galizia li kixfet is-sehem ta' Cheng Chen fix-xiri tal-Power Station.
Iktar kmieni illum The Times ppublikat storja li turi kif Cheng Chen, negozjatur ewlieni fil-proġett tal-Power Station huwa sid il-kumpanija Macbridge, li bħal 17 Black, kienet target client tal-kumpaniji fil-Panama tal-eks Chief of Staff f'Kastilja Keith Schembri u l-eks Ministru Konrad Mizzi, li s-sena l-oħra kien spiċċa mkeċċi mill-Partit Laburista. Dan ifisser li bħal 17 Back - Macbridge kellha tgħaddi flus lill-kumpaniji ta' Schembri u Mizzi.