Il-Gvern qed jistudja d-dati meta tista’ titwaqqaf l-importazzjoni tal-vetturi li jniġġsu
Il-Ministru Miriam Dalli tgħid li Malta għandha l-potenzjal biex isservi bħala ‘testing ground’ għal teknoloġiji ġodda u l-Gvern qed jara kif se jattira investimenti ġodda
minn Yendrick Cioffi
“Biex inkomplu nnaqqsu t-tniġġis mill-karozzi, il-Gvern ħatar kummissjoni għal karozzi aktar nodfa bil-għan li tagħmel ir-rakkomandazzjonijiet dwar għażla ta’ cutoff dates li l-Gvern jista’ jmur għalihom. Dan id-dokument qed ikun ikkunsidrat.” Hekk saħqet mal-gazzetta ILLUM il-Ministru għall-Enerġija, l-Intrapriża u l-Iżvilupp Sostenibbli, Miriam Dalli.
L-ILLUM tkellmet mal-Ministru Dalli wara li fl-aħħar ġimgħat il-gazzetta ltaqgħet ma’ aġenti tal-karozzi li qalu kif id-domanda għall-karozzi elettriċi jew inkella hybrid (li jaħmdu b’aktar minn sors wieħed ta’ enerġija) qed tiżdied, iżda ħafna klijenti jaqtgħu qalbhom għax infrastruttura għalihom ma hawnx u anke għax il-prezz tagħhom għadu ogħli wisq.
Il-gazzetta fakkret lill-Ministru Dalli (li anke meta kienet Membru Parlamentari Ewropew ħadmet ħafna fuq dan is-suġġett), li l-eks Prim Ministru Joseph Muscat qal kemm-il darba li Malta jeħtieġ li jkollha data meta twaqqaf kompletament l-importazzjoni ta’ karozzi li jaħdmu bil-fjuwil. X’sar minn din il-wiegħda?
Il-Ministru qalet li l-impenn tal-Gvern jibqa’ dak li sal-2050, jilħaq il-mira ta’ carbon neutrality, jiġifieri li l-pajjiż ikollu ekonomija u mod ta’ għixien li ma jniġġisx.
Madanakollu, fejn jidħlu l-vetturi, il-Ministru qalet li l-Gvern qed jikkunsidra d-dokument imħejji mill-kummissjoni li kienet twaqqfet biex tistudja kif Malta tista’ twaqqaf l-importazzjoni tal-karozzi li jaħdmu b’sorsi ta’ enerġija li jniġġsu.
“Il-gżejjer Maltin u Għawdxin għandhom il-potenzjal li jservu bħala testing ground għal teknoloġiji ġodda u fil-ħidma tagħna qed naraw kif nistgħu nattiraw investimenti ġodda lejn pajjiżna,” insistiet il-Ministru Dalli.
326 charging point sal-aħħar tas-sena
Komplejna nitkellmu fuq il-mira ta’ carbon neutrality sal-2050 u kif is-settur tat-trasport, bl-elettrifikazzjoni tal-flotta tal-karozzi u l-proviżjoni ta’ charging pillars huwa wieħed mill-pilastri ewlenin biex tintlaħaq din il-mira.
“Fil-fatt, il-Ministeru li mmexxi tal-Enerġija, l-Intrapriża u l-Iżvilupp Sostenibbli flimkien mal-Ministeru għat-Trasport u l-Infrastruttura għaddejjin b’ħidma konġunta fuq dawn l-aspetti,” qalet il-Ministru.
L-għan huwa, kompliet tispjega, li l-pajjiż ikollu strateġija olistika biex mhux biss jiżdiedu n-numru ta' punti ta' aċċess għaċ-charging pillars madwar Malta u Għawdex, imma biex dan isir bi pjan.
“Qed naħdmu fuq it-tisħiħ tal-infrastruttura pubblika eżistenti biex sal-aħħar tas-sena, jkollna 362 punt ta’ charging,” spjegat Dalli.
Aċċessibbilità u prezzijiet
Insistiet ukoll li ż-żieda fin-numru ta’ karozzi li jniġġsu jew iniġġsu anqas (ZLEVs), jiddependi minn żewġ fatturi: il-politika u d-direzzjoni li jagħti l-Gvern kif ukoll l-aċċessibilità ta’ dawn il-karozzi u kemm min jimmanifattura l-karozzi jipproduċi karozzi ZLEVs, bi prezzijiet li jagħmlu sens għall-konsumaturi.
“Waħda tiddependi mill-oħra, u din hija xi ħaġa li tapplika għas-suq internazzjonali u mhux Malti biss. Aktar ma jkun hemm takeup, aktar se jonqos id-distakk bejn il-prezz ta’ karozza konvenzjonali u dak ta’ ŻLEVs,” kompliet tispjega l-Ministru.
Iżda mhux il-Gvern waħdu...
Fakkret li din it-tranżizzjoni mhijiex xi ħaġa li għandu jagħmel il-Gvern waħdu biss imma tgħodd anke għas-settur privat. Spjegat kif ftit tal-ġimgħat ilu kienet preżenti għal proġett ambizzjuż ta’ kumpanija privata li sal-2025 qed tippjana li tbiddel il-karozzi kollha tagħha għal dawk li ma jniġġsux.
Aktar kmieni dan ix-xahar, il-Gvern ħareġ sejħa biex isir studju biex il-vetturi tas-settur pubbliku li jaħdmu bil-fjuwil jinbidlu għall-karozzi li jaħdmu bl-elettriku.
Huwa stmat li t-tniġġiż tal-arja joqtol nofs miljun persuna fis-sena fl-Unjoni Ewropea. F’Malta biss, it-tniġġiż tal-arja huwa responsabbli għal 220 mewta fis-sena.
Aqra aktar:
