Minn erba' għal tnejn ... gruppi ġewwa jistgħu jkunu membri minn żewġ residenzi differenti biss

Nies li jiltaqgħu ġewwa, mil-lum, jistgħu jkunu biss membri ta' żewġ familji (households) minflok l-erba' li hi bħalissa u li tħabbar ġimgħa ilu mar-restrizzjonijiet. 

Dan qalitu s-Supretendent tas-Saħħa Pubblika Charmaine Gauci meta kienet qed twieġeb mistoqsijiet tas-sit timesofmalta.  Hi qalet ukoll li din id-deċiżjoni ittieħdet wara li kienet evalwata s-sitwazzjoni u l-awtoritajiet sabu li l-maġġoranza tal-każi għadhom qed jirriżultaw minn fost il-familji stess. 

Hija qalet illi l-avviż legali se jkun ippubblikat illum u l-awtoritajiet se jkunu qed jinvestigaw kwalunkwe rapporti li jirċievu.  Ħeġġet iżda għar-responsabilità fost il-popolazzjoni.

Dan b’eċċezzjoni għall-ħaddiema li jkunu qed jagħmlu xogħlijiet jew jagħtu servizz fi proprjetajiet privati.

Intant, se jibqa’ fis-seħħ kif inhu l-Avviż Legali li jipprojbixxi li jinġemgħu gruppi ta’ aktar minn 4 persuni fil-pubbliku, sakemm ma jkunux persuni li jgħixu fl-istess residenza.

Il-Ministeru tas-Saħħa qal li dawn il-miżuri qegħdin jidħlu fis-seħħ sakemm it-tilqim kontra l-COVID-19 ikun wasal għand firxa wiesgħa tal-popolazzjoni, u b’hekk tkompli tiġi kkontrollata l-imxija tal-COVID-19 f’pajjiżna.

Intant illum tħabbru 211 każ ġdid ta' Covid-19 filwaqt li d-dożi ta' kontra l-virus issa qabżu l-130,000.