Il-kunsill reġjonali ta’ Għawdex qal lill-President George Vella li l-awtoritajiet għandhom jaħdmu biex iwaqqfu l-qerda tal-pajsaġġ Għawdxi minħabba l-iżvilupp.
Is-Sindki Għawdxin kellhom laqgħa dalgħodu mal-President u fi tmiemha, Samuel Azzopardi, il-president tal-kunsill reġjonali, insista mal-ġurnalisti li huma mhumiex kontra l-iżvilupp sostenibbli iżda kontra l-iżvilupp rampanti li ma jieħu xejn aktar inkonsiderazzjoni.
Azzopardi insista li din l-isfida għandha tkun indirizzata.
“Nifhmu li l-Uffiċċju tal-President għandu l-limitazzjonijiet tiegħu imma din hija waħda minn sensiela ta’ laqgħat mal-awtoritajiet biex aħna nressqu ‘l quddiem it-talba tagħna li jkun hemm politika propja li tipproteġi lill-gżira Għawdxija,” saħaq Azzopardi.
Il-kunill reġjonali mistenni jkollu laqgħat mal-Ministeru għall-Ambjent u anke mal-Awtorità tal-Ippjanar.
Preżenti wkoll kien hemm is-Sindku tal-Qala li appella biex iż-żona tal-Ħondoq tkun kklassifikata bħala ODZ.