Hekk kif illum kien reġistrat rekord assolut ta' każi ta' Covid-19 - b'total ta' 510 każ ġdid f'24 siegħa - l-Unjin Maltija tal-Għalliema (MUT) rresġistrat tilwima industrijali jekk ma jittiħdux passi mill-Gvern fid-dawl, mhux biss ta' din iż-żieda imma wkoll fid-dawl tal-konferma illi l-virus issa qed jinxtered ukoll fost it-tfal. Kienet is-Supretendent tas-Saħħa Pubblika Charmaine Gauci illi żvelat dan dalgħodu, hekk kif qalet ukoll li bħalissa 12% ta' dawk li għandhom il-Covid-19 huma tfal.
L-MUT qalet li s-sitwazzjoni hija tali illi l-Ministeru tal-Edukazzjoni diġà ta permess biex numru ta' skejjel imorru kompletament online. Saħqet ukoll illi n-numri tal-virus fl-iskejjel qed jiżdied b'tali mod li "qegħdin qrib li s-servizz tal-iskejjel ma jibqax sostnut."
Il-unjin temmet issostni fi stqarrija li dan ifisser li r-riskji fuq l-edukaturi qed jiżdied u qalet illi minkejja li l-għalliema bdew jieħdu l-vaċċin "il-proċess għadu lura" u "hemm ammonti kbar ta' ħaddiema fl-iskejjel li għadhom lanqas irċevew appuntament."