Il-Qorti laqgħet mandat tal-Gvern biex azzjonijiet industrijali mill-Unjin għall-Infermiera u l-Qwibel (MUMN) fis-settur tas-saħħa jitwaqqfu ghax il-Gvern qal li dawn qed jaffetwaw is-servizzi essenzjali, b'sorsi mill-Isptar jgħidu li diversi pazjenti kellhom jistennew għal sigħat sħaħ jew saħansitra jintbagħtu lura d-dar - bl-appuntament pospost - minħabba dawn id-direttivi.
L-MUMN tat direttivi - li qalet illi kienu mija il-mija suċċess - primarjament sabiex l-infermiera jibdew jingħataw l-istess allowances li għandhom professjonisti oħrajn fil-qasam tas-saħħa u l-kura.
"Li jintużaw il-Qrati biex jitwaqqfu l-membri tal-MUMN milli jeżerċitaw id-drittijiet tagħhom, mhix aċċettabbli f'pajjiż demokratiku, speċjalment meta unjins oħrajn qed jiġu trattati b'mod differenti."
"Dan huwa att ta' arroganza u tradiment kontra l-frontliners mill-Prim Ministru u l-Ministru tas-Saħħa u dan il-mandat qed jibgħat messaġġ ċar lill-infermiera u l-qwiebel illi ma hemm ebda rispett lejn din il-professjoni mill-Gvern," sostniet l-istess unjin.
Intant dan is-sit staqsa lill-President tal-MUMN Paul Pace dwar messaġġ li ra, illi fih uffiċjal tal-MUMN qed jappella lill-ħaddiema biex ikomplu bl-azzjonijiet industrijali u ma jagħtux każ ta' x'qed jgħid il-maniġment. Pace qal li dan ma għandux x'jaqsam ma' dawn id-direttivi, imma ma' direttivi separati li għaddejjin fuq kwistjoni differenti fiċ-Ċentru tal-Onkoloġija.
L-MUMN qalet illi se tirrispetta dan il-mandat sal-Erbgħa 22 ta' Diċembru meta se jsir is-smigħ dwaru quddiem il-Qorti.