Illejla l-Ministru tal-Finanzi Edward Scicluna ħabbar illi l-Gvern se jkun qed jerġa' jgħolli ċ-children's allowance
Fejn id-dħul tal-familja ma jaqbiżx il-€25,318 fis-sena, ir-rata ta’ dan is-suppliment se tkun ta’ €70 fis-sena għal kull wild.
Min-naħa l-oħra għall-kumplament tal-familji, fejn id-dħul jaqbeż dan l-ammont, is-suppliment se jkun ta’ €50 fis-sena għal kull wild.
B’dan il-mod familja tipika b’żewġt itfal taħt is-16-il sena, jekk id-dħul tal-familja ma jaqbiżx il-€25,318, se tkun qed tieħu żieda ta' €140 fis-sena waqt li fejn id-dħul jaqbeż dan l-ammont tieħu żieda ta' €100.
Minn din il-miżura, li se tiswa aktar minn €3 miljun, se jgawdu aktar minn 40,000 familja b’60,500 tifel u tifla.
Intant f'dak li jirrigwarda tfal ukoll il-Gvern se jżid il-Foster Care Allowance biex minn Jannar li ġej dan il-benefiċċju se jiżdied b’€520 oħra fis-sena għal total ta’ €5,720.
Apparti dan il-Gvern ħabbar ukoll għotja sa massimu ta' €1,000 lil dawk il-ġenituri li jixiequ jadottaw.