Fil-Baġit illejla l-MInistru Edward Scicluna ħabbar illi l-kumpens tal-għoli tal-ħajja, magħrufa bħala COLA li jiġi kkalkulat skont mekkaniżmu partikolari li jikkalkula l-għoli tal-ħajja, huwa ta' €1.75 fil-ġimgħa. Il-Ministru qal illi ż-żieda tirrifletti l-inflazzjoni baxxa li kellna dan l-aħħar 12-il xahar.
Intant il-Gvern ħabbar ukoll illi se jagħti lura ġurnata oħra leave li taqa' fi tmiem il-ġimgħa u li Gvern Nazzjonalista kien iddeċieda li ma jibqax jagħti. Dakinhar il-Gvern u dawk li jħaddmu kienu qalu illi din il-miżura kienet immirata biex iżżid il-produttività, bil-General Workers' Union tkun fuq quddiem kontra l-miżura u l-Partit Laburista jwiegħed - qabel l-2013 - lli jagħti lura dawn il-festi jekk elett fil-Gvern.