L-MUT tagħti ultimatum lill-Gvern; Jew titrażżan il-pandemija jew direttivi għall-edukaturi
Twissi li fi ftit jiem jista’ jkun hemm skejjel li ma jkollhomx edukaturi biżżejjed biex jagħtu servizz
More in Politika
Twissi li fi ftit jiem jista’ jkun hemm skejjel li ma jkollhomx edukaturi biżżejjed biex jagħtu servizz
Il-Unjin Maltija għall-Għalliema tat ultimatum lill-Gvern biex idaħħal miżuri biex tkun ikkontrollata l-imxija tal-Covid-19.
Fi stqarrija, l-MUT ħabbret li se tagħti ċans sa nhar il-Ħamis 15 ta’ Ottubru biex il-Gvern "jibgħat messaġġi ċari, jieħu miżuri ġodda li jrażżnu t-tixrid tal-virus filwaqt li jżid il-miżuri tal-infurzar."
Sadanittant, l-MUT qalet li se tkun qed tħabbar sett ta’ direttivi li jħarsu s-saħħa u s-sigurtà tal-edukaturi.
"In-numru ta’ każijiet pożittivi f’pajjiżna huwa kbir filwaqt li dan, flimkien mar-rata tat-trasmissjoni fil-komunità, ser iħalli mpatt fuq l-iskejjel. Kif kien mistenni, diġà kien hemm każijiet pożittivi fl-iskejjel. Din is-sitwazzjoni ma tawgurax tajjeb, u fi ftit jiem jista’ jkollna skejjel li ma jkollhomx edukaturi biżżejjed biex jagħtu servizz minħabba ċirkustanzi ta’ leave tal-kwarantina jew tal-mard," insistiet l-MUT
Hija saħqet li l-isforzi kollha tal-edukaturi, li qed jimplimentaw protokolli tas-saħħa riġidi fl-iskejjel, ser jisfumaw fix-xejn meta l-istudenti jkunu barra mill-iskejjel.
"Huwa magħruf li l-miżuri meħuda mill-gvern, bħal dawk tad-distanza soċjali, mhux qed jiġu infurzati kullimkien. Dan filwaqt li l-miżuri l-oħra, li għandhom l-għan li jrażżnu t-tixrid tal-virus, huma ftit wisq. Barra minn hekk għad hemm wisq direzzjonjiet kunfliġġenti mill-istess esponenti tal-gvern," temmet tgħid il-unjin.
Aqra wkoll: