Illejla jkun deċiż min miż-żewġ kandidati probabbilment se jkun qed jieħu lill-Partit Nazzjonalista għall-elezzjoni ġenerali li ġejja, jekk hux il-Kap kurenti Adrian Delia jew inkella hux Bernard Grech, li allura jkun ifisser il-PN ikollu Kap ġdid.
Delia bbaża il-kampanja tiegħu fuq il-lealtà filwaqt li Grech bbażaha fuq l-għaqda fil-Partit Nazzjonalista, għalkemm naturalment it-tnejn għamlu referenzi għaż-żewġ temi, apparti oħrajn li jirreletaw lill-PN u oħrajn ta' natura nazzjonali
Hawn hi l-intervista li għamlet il-gazzetta ILLUM mal-avukat Bernard Grech.
Hawn hi l-intervista li għamlet il-gazzetta ILLUM ma' Adrian Delia, Kap kurrenti.
Intant sal-bieraħ - ftit qabel l-aħħar siegħat tal-votazzjoni l-aktar kaxxi li fihom intefgħu voti kienu dawn: Is-Swieqi (San Ġiljan u Pembroke) fejn intefgħu 81% mill-1,077 vot eliġibbli, Ta' Xbiex (u l-Gżira) fejn intefgħu 82.7% tal-416-il vot eliġibbli u Ħal Balzan (U Ħ'Attard u Ħal Lija) fejn ivvutaw 80.3% tal-1,238 tesserat.
Dawn il-lokalitajiet huma fejn Grech jidher li huwa b'saħħtu u għandu maġġoranza komda, flimkien ma' Tas-Sliema, Għawdex u Mellieħa/San Pawl il-Baħar.
F'Tas-Sliema, sal-bieraħ, kienu vvutaw 78.6% mill-1,288 tesserat, filwaqt li f'Għawdex kienu vvutaw 74.7% tal-1,719-il tesserat. Fil-Mellieħa u San Pawl il-Baħar kienu vvutaw 76.4% tal-1,461 tesserat.
Fil-lokalitajiet fejn Delia huwa b'saħħtu u allura l-Kottonera u dawk fit-tielet distrett (Żejtun ...) ivvutaw hekk: Fil-kaxxa tal-Isla (Bormla, Birgu, Kalkara, Ħaż Żabbar u x-Xgħajra) ivvutaw 77.8% tal-1,107 tesserat, filwaqt li fiż-Żejtun (Ħal Għaxaq u l-Gudja) ivvutaw 76.7% mis-744 tesserat.
Il-persentaġġ totali tal-vot kien ilaħħaq is-76% ta' dawk eliġibbli sal-bieraħ.