Hekk kif ilbieraħ issoktat il-votazzjoni fost it-tesserati Nazzjonalista biex ikun magħżul kap għall-Partit, ivvutaw 16%-il persuna oħra.
Dan ifisser li minn meta fetħet il-votazzjoni, bħal-lum ġimgħa, vvutaw 67% ta' dawk eleġibbli li huma kważi 21,500.
Minn ċifri li għandu f'idejh dan is-sit jirriżulta li l-aktar li vvutaw kienu dawk eliġibbli fis-Swieqi, San Ġiljan u Pembroke fejn sal-bieraħ, ir-raba' jum tal-votazzjoni, kienu diġa' vvutaw 74% tat-tesserati Nazzjonalisti. F'Ta' Xbiex u l-Gżira ivvutaw 73.8% tat-tesserati sal-bieraħ filwaqt li fil-kaxxa ta' Ħal Balzan, li tinkludi wkoll lit-tesserati ta' Ħ'Attard u Ħal LIja sal-bieraħ kienu vvutaw b'kollox kważi 72%.
F'Tas-Sliema - il-lokalità bl-akbar numru nta' tesserati - ivvutaw b'kollox 71% ta' dawk eliġibbli. Hawnhekk hawn b'kollox 1,288 tesserat.
F'Għawdex, fejn hemm b'kollox 1,711-il tesserat u hawnhekk ivvutaw 66.7%, eżatt daqs il-persentaġġ ta' tesserati tat-tnax il-distrett li jinkludi lill-Mellieħa u San Pawl il-Baħar.
Il-votazzjoni tkompli llejla bejn is-6pm u d-9pm u anke għada bejn it-8pm u s-2pm f'Għawdex u bejn it-8pm u l-4pm f'Malta.
Wara, il-kaxxi kollha, mifrux fi 17-il post tal-votazzjoni, jitwasslu d-Dar Ċentrali biex ikun jista' jibda l-proċess tal-għadd.
Sal-11pm mistenni li jkun hemm l-ewwel indikazzjonijiet tar-riżultat uffiċjali.
Minħabba l-pandemija, il-votazzjoni nfirxet fuq sitt ijiem.
