L-eks Chief of Staff f'Kastilja Keith Schembri ingħata l-ħelsien mill-arrest iżda tpoġġa taħt Police Bail wara kważi ġurnata ta' interrogazzjonijiet fid-Depot tal-Pulizija. Dan sigħat wara li l-Qorti ordnat l-iffriżar tal-assi tiegħu, ta' martu u ta' Brian Tonna il-Managing Partner ta' Nexia BT - l-ażjenda li fetħet il-kumpaniji fil-Panama ta' Schembri (Tillgate Inc.), tal-eks Ministru Konrad Mizzi (Hearnville Inc.) kif ukoll Egrant Inc., li Tonna jgħid li kienet tiegħu.
Keith Schembri deher ħiereġ mid-Depot, akkumpanjat mill-Avukati tiegħu, ftit wara d-9pm. Dak il-ħin ma kienx hemm ġurnalisti ħlief wieħed tal-PBS li staqsa lil Schembri dwar xiex kien mistoqsi. Schembri baqa' sieket sakemm daħal fil-karozza u telaq.
Schembri - li qed ikun implikat fil-qtil ta' Daphne Caruana Galizia minn Yorgen Fenech - kien akkużat mill-eks Kap tal-Oppożizzjoni Simon Busuttil illi ixxaħħam meta ħa flus mil-għoti taċ-ċittadinanza b'investiment. L-akkuża kienet illi Schembri kien ħa b'kollox €100,000 mill-bejgħ tal-passaporti.
Schembri implikat fil-qtil ta' Daphne Caruana Galizia ... ħallas €80,000 biex tinqatel kien qal Yorgen Fenech
Schembri, li kien persuna ċentrali u kruċjali fil-Gvern ta' Joseph Muscat ssemma' diversi drabi fil-kumpilazzjoni tax-xhieda fil-każ kontra Yorgen Fenech, bit-Tabib Adrian Vella jixhed illi darba kien mar għand Schembri fid-dar tiegħu, l-Mellieħa, u hemmhekk dan kien għaddielu numru ta' karti li kienu rashom 'l isfel. Hu kien ħadhom - mingħajr ma qatt ħares lejhom, qal - għand Fenech fl-appartament ta' Portomaso. Tajjeb wieħed ifakkar, għalkemm mhux ċar jekk dawn il-fatti humiex relatati, illi l-membri tal-Kabinett kienu rċevew ittra li kienet titfa' l-ħtija tal-assassinju ta' Carauna Galizia fuq l-eks Ministru Chris Cardona.
Iktar sinjifikattiva kienet ix-xhieda tal-Ispettur Keith Zahra li qal fil-Qorti kif interrogat mill-Pulizija Yorgen Fenech kien qal li Schembri kien il-moħħ wara dan l-assassinju u li kien qed jgħaġġlu biex dan isir. Ta' min ifakkar illi l-pjanijiet għall-qtil ta' Caruana Galizia kienu twaqqfu, kien xehed Melvin Theuma, meta kienet se titħabbar l-elezzjoni u Fenech ordna lil Theuma biex dawn il-pjanijiet ikomplu ladarba fl-2017 rebaħ il-Partit Laburista mmexxi minn Joseph Muscat.
Fenech kien qal lill-Pulizija illi Schembri kien ħallas sa €80,000 biex isir dan il-qtil.
Il-kumpaniji fil-Panama u 17 Black
L-inkwiet, allegazzjonijiet u akkużi fil-konfront ta' Schembri kienu jiċċentraw ħafna madwar il-kumpanija tiegħu fil-Panama u r-rabta li din kellha ma' 17 Black, kumpanija fid-Dubaj ta' Yorgen Fenech.
Kien id-Daphne Project - konsorzju ta' ġurnalisti - li żvela emails minn Nexia BT li kienu juru kif 17 Black kienet target client tal-kumpanija fil-Panama ta' Schembri u Mizzi. Żvelaw ukoll kif f'17 Black għaddew $1.6 miljun, li minnhom $1.4 miljun kienu ġejjin mill-Ażerbajġan - pagament suspettuż mitfugħ fuq isem persuna li taħdem bħala security: Rufat Baratzada. L-Ażerbajġan huwa l-pajjiż minn fejn il-Gvern Malti daħal f'kuntratt biex jixtri l-gass għal 18-il sena, huwa l-pajjiż tas-Socar Trading, li għandha 33.3% sehem fil-Power Station il-ġdida li kellu sehem fiha wkoll Yorgen Fenech permezz ta' Tumas Group u huwa l-pajjiż tal-familja tad-Ditattur Ilham Aliyev illi fetħet kontijiet fil-Bank Pilatus.
Imbagħad l-istess informazzjoni kienet turi kif $200,000 allegatament daħlu f'17 Black mill-Aġent Malti tat-Tanker tal-LNG sorġut f'Delimara.
Keith Schembri, flimkien mal-eks PM Joseph Muscat kellhom Whatssapp chat ma' Yorgen Fenech, li saħqansitra kien mistieden għall-festin ta' għeluq żmien l-eks PM fil-Girgenti.
