Meta kien qed jitkellem fuq Net FM Bernard Grech ammetta li hemm diżappunt fost in-nies għall-aħbar tat-taxxa u VAT mhux imħallsa minnu - storja żvelata l-Ħadd li għadda fuq il-gazzetta ILLUM - u reġa' apoloġizza għal għemilu. "Naf li kienu diżappuntati dawk li emmnu fija ... ħafna nies huma esiġenti u din ir-reazzjoni wriet kemm huma esiġenti u li kulħadd jippretendi livell għoli ta' politika." Grech qal illi hu mtela' bil-kuraġġ għax qed jara minn din l-istess reazzjoni li s-soċjeta trid is-sewwa, il-ġustizzja u t-trasparenza. "Għandi tama li n-nies ma jridux li kollox jgħaddi. In-nies trid aħjar u għandha dritt trid aħjar u dan allura huwa tajjeb."
"Il-piż huwa fuqi u fuqi biss," iċċara Grech dwar ir-responsabilità tan-nuqqas tiegħu.
Huwa qal illi ħallas il-pendenzi kollha li kellu u li dawn kienu mħallsa kif ħallas taxxa u għadda returns. "Minħabba returns mhux fil-ħin kelli nħallas penali. Weħilt imgħax u ħallasthom u għamilt dan minn flusi u minn flus il-familja tiegħi," iċċara Grech.
Kienet il-gazzetta ILLUM li żvelat dawn il-pendenzi li jinfirxu matul snin u l-fatt li Grech fil-fatt ħallas dawn il-pendenzi li flimkien - VAT u taxxa tad-dħul - laħqu t-€62,000. Grech iżda ma weġibx il-mistoqsijiet tal-gazzetta dwar kif tħallas dan l-ammont.
"Nerġa nikkonfermalek li m'għandix ċenteżmu mhux imħallas u għandi l-irċevuti u ċ-ċertifikat tal-Kummissarju tat-Taxxi li juri dan," sostna.
Dwar is-sondaġġi qal li hu ma jaqta' qalbu qatt u sostna li l-għaqda li jrid fil-PN hija waħda li tkun mibnija fuq il-komunikattiva, diskussjoni fuq livelli differenti u l-involviment ta' kulħadd. "Hekk biss persuna tagħti l-aħjar tagħha ... mhux ngħajjatlek għall-vot. Imma biex nisimgħak, nempatizza miegħek u naħdmu fuq ll-problema," saħaq Grech.