Waqt Konferenza tal-Aħbarijiet f'Kastilja llejla l-Prim Ministru Robert Abela qal illi l-Baġit ta' €2.25 biljun - miksub minn Malta wara sigħat ta' negozjati - huwa "ġust" u "għandu sinjifikat kbir" u qal li dawn ma jinkludux flus li huma self u huma biss allokazzjonijiet għal Malta. Ifakkar illi dawn il-flus se jfissru investiment għat-tħaddir tal-pajjiż u għall-ekonomija, fost oħrajn. "Dawn il-fondi se jwasslu biex inkomplu niġġeddu, nsaħħu l-investiment, inkomplu ninvestu fl-agrikolatura speċjalment l-iżvilupp rurali, is-sajd u l-akwakultura."
Għall-agrikoltura biss, il-Gvern Malti kiseb €194 miljun mill-Baġit Ewropew u €327 miljun mill-Fond ta' Rkupru. Dan il-fond fih flus li se jgħinu lill-ekonomija Maltija, illi bħalissa ħierġa mid-daqqa tal-pandemija Covid-19.
Il-PM Abela qal illi minn dawn il-flus, €1.9 biljun se jkunu fondi taħt il-Framework Annwali u allura l-baġit tradizzjonali tal-UE, li jfakkar illi huma €800 miljun aktar minn dak li kien inkiseb minn pajjiżna mill-Baġit Ewropew tal-2014 sal-2022, innegozjat mill-eks PM Lawrence Gonzi. Huwa qal li l-Gvern iddeċieda illi 10% minn dawn il-fondi ta' Koeżjoni jmorru għal Ghawdex.
Abela fakkar illi meta bdew dawn id-diskussjonijiet il-proposta tal-Kummissjoni Ewropea kienet li Malta tirċievi €798 miljun u l-allokazzjoni żdiedet b'miljuni wara negozjar li baqa' sejjer sa kmieni dalgħodu.
Il-PM temm ifakkar li minkejja din iż-żieda fil-flus allokati għal Malta mill-Unjoni Ewropea il-Prodott Gross Domestiku kien għadu qed jikber b'livelli baxxi ħafna ta' qgħad - żewġ fatturi li ġeneralment jaħdmu kontra l-għoti ta' aktar fondi.
Intant l-armonazzjoni tat-taxxa ma kinitx parti mid-diskussjonijiet u Malta se tkompli ssostni l-pożizzjoni tagħha.
