Il-PM talab lil Konrad Mizzi ma jibqax Deputat Laburista, iżda Konrad Mizzi - f'messaġġ twil li tella' fuq il-paġna tiegħu ta' Facebook - ma aċċettax. "Filwaqt li nirrispettah u x-xogħol li qed jagħmel għal pajjiżna, ma qbiltx li għandi nwarrab fuq allegazzjonijiet u spekulazzjonijiet mbuttati ‘l quddiem mill-avversarji tal-Partit Laburista," qal Mizzi.
Il-Prim Ministru u Mexxej Laburista Robert Abela, għandu l-jedd ineħħi Deputat mill-Grupp Parlamentari, iżda ma jistax ineħħiħ minn Deputat u allura li jista' jiġri huwa li Mizzi jibqa' Deputat indipendenti, bħal Marlene Farrugia u Godfrey Farrugia.
Din hija t-tieni tkeċċija ta' Abela f'temp ta' ġimgħa hekk kif fil-bidu tal-ġimgħa l-oħra tneħħa Chris Cardona minn Deputat Mexxej Laburista wara xhieda fil-Qorti li timplikah fil-qtil ta' Daphne Caruana Galizia.
Ara kif Cardona kien implikat fil-qtil tal-ġurnalista fix-xhieda li ħarġet fil-Qorti
X'ħareġ il-ġimgħa l-oħra dar il-Wind Farm fil-Montenegro?
Konrad Mizzi kien Ministru tal-Enerġija meta sar il-ftehim għal Wind Farm fil-Montenegro. Nhar il-Ġimgħa kien żvelat kif ilbieraħ kien żvealt kif Yorgen Fenech allegatament għamel profitt ta' €4.6 miljun permezz tal-kumpanija tiegħu reġistrata d-Dubaj, 17 Black, mid-deċiżjoni tal-Enemalta li tixtri wind farm fil-Montenegro.
Kienet il-kumpanija Cifidex li biegħet l-ishma tal-wind farm bi prezz ta' €10.3 miljuni lill-Enemalta u li allegatament xtrat ġimagħtejn qabel biss minn Fersa Renovables - Konsorzju Spanjol - għal €2.9 miljun, differenza ta' €7.4 miljuni. €4.6 miljun minnhom huwa allegat li baqgħu f'17 Black bħala profitt għal Yorgen Fenech. Din l-informazzjoni ħarġet dalgħodu minn investigazzjoni li saret minn Reuters u The Times of Malta, bl-istess rappurtaġġ jgħid illi €3 miljuni kienu trasferiti minn 17 Black għal għand Cidifex. Jiġifieri l-flus ta' Cidifex biex tixtri l-Wind Farm kienu ġejjin minn Yorgen Fenech.
Cidifex hija kumpanija reġistrata fil-gżejjer tas-Seychelles
Il-kumpanija 17 Black kienet żvelata bħala target client tal-kumpaniji Tillgate u Hearnville, kumpaniji fil-Panama miftuħin minn Keith Schembri u Konrad Mizzi rispettivament. L-istess Reuters u The Times bħala Daphne Project, kienu irrappurtaw kif - allegatament - kienu għaddew mal-$1.4 miljun minn Rufat Baratzada - security f'sit ta' kostruzzjoni fl-Ażerbajġan - lejn 17 Black, filwaqt li allegatament għaddew ukoll $200,000 għal 17 Black mill-aġent tat-tanker tal-gass f'Delimara, xi ħaġa li dan ċaħad.
Meta Carauna Galizia kienet bdiet tindika li għandha informazzjoni dwar 17 Black, din il-kumpanija biddlet isimha għal Wings Development.
Minkejja dan sa issa m'hemm ebda prova li dawn il-flus kienu laħqu għaddew f'Hearnville u Tillgate u lanqas hu magħruf iżda x'sar minn dawn l-€4.6 miljun. Noor Bank kien għalaq il-kontijiet ta' 17 Black u $1.6 miljun lil Yorgen Fenech għax ħadd ma talab l-iffriżar ta' dawn il-flus, kien qal il-Kap tal-FIU tal-UAE.
L-eks Ministru ċaħad illi hu qatt wettaq l-akkużi u ħeġġeġ lill-Enemalta tippubblika id-dokumenti kollha f'dan ir-rigward.
