Daniel Josè Micallef, President kurrenti tal-Partit Laburista jidher li għandu appoġġ qawwi fost ħafna delegati, b'diversi attivisti Laburisti jtellgħu ritratti tiegħu u jappoġġjawh għall-kandidatura possibbli u prospettiva għall-kariga ta' Deputat Mexxej tal-PL għall-Affarijiet tal-Partit. Sorsi li tkellmu mal-illum.com.mt qalu illi Micallef għandu l-appoġġ għax huwa meqjus politiku ta' integrità u nadif, żagħżugħ u wera' kemm għandu komunikattiva tajba fl-aħħar attività li saret illi fiha Joseph Muscat tkellem bħala Mexxej Laburista. Micallef kien ukoll responsabbli mill-proċess elettorali ta' mexxej ġdid Laburista aktar kmieni din is-sena, proċess deskritt bħala effiċjenti u trasparenti, minn bosta minn dawk illi kienu preżenti - inkluż il-midja.
Intant ara x'kien qal Micallef f'intervista mal-gazzetta ILLUM.
Kif żvela aktar kmieni dalgħodu s-sit illum.com.mt hemm diskussjoni fil-Partit Laburista dwar il-possibilità li titreġġa' lura bidla fl-istatut li saret u li permezz tagħha Konrad Mizzi kien inħatar f'din il-kariga fl-2016. Hu ma damx f'din il-kariga minħabba r-rivelazzjonijiet tal-Panama papers. Cardona wkoll kien f'din il-kariga meta kien kemm Deputat, kif ukoll Ministru tal-Ekonomija. Jidher illi hemm moviment b'saħħtu fil-partit biex din titbiddel u d-Deputat Mexxej għall-Affarijiet tal-Partit ikun iffukat fuq materji tal-partit - bħal ma kienu id-Deputati Mexxejja Toni Abela, Joe Brincat u anke George Abela. F'dan ix-xenarju - qalulna s-sorsi li tkellmu ma' dan is-sit - jaf lanqas ikun hemm kontestazzjoni ma' Micallef.
Micallef mhux l-unika wieħed li għandu interess f'din il-kariga iżda u dan is-sit jinsab infurmat li jekk l-istatut ma' jinbidilx hemm Ministri u anke Segretarji Parlamentari li jkunu interessati f'din il-kariga.
