Mill-aħħar statistika maħruġa mid-Dipartiment tas-Saħħa jirriżulta li minn 640 każ, sal-lum, 600 persuna fieqet mill-Covid-19 f'pajjiżna. Dan ifisser ir-rata ta' fejqan tal-Maltin jew dawk li jgħixu Malta hija ta' 93.7%. Minn dak li jifdal, jiġifieri 40 - 31 għadhom bil-virus filwaqt li disa' tilfu ħajjitom.
Dan ifisser illi r-rata ta' mortalità f'pajjiżna għall-Covid-19 hija ta' 1.4%.
Illum, l-istess Dipartiment ħabbar illi hawn ħames każi ġodda ta' Covid-19 li huwa mifhum illi uħud minnhom huma minn cluster fl-isptar. Dawn il-ħames każi jirriżultaw minn total ta' 904 testijiet. B'kollox, sal-lum, saru 78,788 test u li minnhom rriżultaw 640 każ pożittiv għall-Covid -19 - jiġifieri 0.8%.
Intant fl-istess 24 siegħa fiequ tliet persuni oħra.
Dan ifisser illi fl-aħħar ġimgħa żdiedu l-każi attivi, għalkemm xorta jibqgħu inqas mit-total ta' każi attivi nhar l-1 ta' Ġunju, meta kien hawn 73 każ attiv. Illum Malta għandha 31 każ attiv.