Fl-aħħar 24 siegħa - apparti l-mewt ta' tabib ta' 53 sena - fiequ tnejn minn nies mill-Covid-19 biex b'kollox sa issa fiequ 436 persuna. Minn naħa l-oħra kien hemm żewġ każi ġodda biex il-każi attivi issa huma ta' 66.
Iż-żewġ każi ġodda huma t-tnejn nisa: Waħda li hija ħaddiema fl-Isptar Karin Grech u li kellha kuntatt ma' persuna li rriżultat fil-pożittiv. Hija kellha sintomi ta' sogħla u uġigħ ta' ras. Il-każ l-ieħor huwa ta' mara ta' 24 sena li tgħix ma' persuna li wkoll irriżultat fil-pożittiv. Hija kellha qtugħ ta' nifs, għejja u uġigħ ta' ras.
Dwar iċ-ċentru miftuħ ta' Ħal Far is-Supretendent tas-Saħħa Pubblika sostniet illi hawnhekk ħafna se jtemmu il-kwarantina llum f'nofs il-lejl. Hija qalet illi minn 50 każ hawnhekk, 47 fiequ u ħarġu mill-kwarantina, ħamsa fiequ u għadhom fl-aħħar ftit jiem ta' kwarantina filwaqt li żewġ każi għadhom attivi.