Waqt Konferenza tal-Aħbarijiet f'Kastilja l-Prim Ministru Robert Abela ħabbar illi b'effett minn nhar it-Tnejn numru ta' stabbilimenti kummerċjali se jkunu jistgħu jiftħu mill-ġdid.
Ir-rilaxxament tal-miżuri huma hekk: Se jerġgħu jinfetħu u jibdew xi servizzi tas-saħħa li twaqqfu, fosthom il-kliniċi kollha se jerġgħu jibdew jagħtu t-tilqim lit-tfal, se jerġa jibda l-iscreening tal-utru, imbagħad jiżdiedu l-iscreening ta' aktar tipi ta' kanċer. Se tiżdied l-attività fl-isptar Mater Dei, fosthom l-Endoskopiji, se jiżdiedu l-appuntamenti għall-ultra sounds u se jerġgħu jibdew joperaw aktar servizzi fid-dipartiment tal-kardjoloġija.
Dawk il-ħwienet li jistgħu jiftħu minn nhar it-Tnejn huma dawk tal-ħwejjeġ u ħwejjeġ sportivi, aċċessorji, ħwienet tal-lottu, VRT, ġojjellerija, ħwienet tan-nuċċalijiet, ħwienet tal-għamara, shopping malls, ħwienet tal-fjuri, tal-passatempi, taż-żraben u dawk tal-ġugarelli. Ħwienet oħra ma jistgħux jiftħu għalissa. Kien imħabbar ukoll li li kull ħaddiem li jaħdem f'dawn il-ħwienet u kull min jidħol fihom huwa obbligat li jilbes maskra.
Dan apparti li gruppi ta' nies flimkien issa se jitla' għal erbgħa minn nies u mhux iktar. Gruppi ta' aktar jistgħu jaqilgħu multi imposti skont il-liġi.
Miżura oħra se tkun ir-rilassament ta' vjaġġar bejn Malta u Għawdex taħt kontrolli ta' ddistanzjar soċjali.
Intant il-PM ħabbar ukoll illi qed jara illi n-negozji jerġgħu jkunu fetħu sal-aħħar tax-xahar, dejjem jekk in-numri jibqgħu kif inhuma bħalissa.
'Kburi li rreżistejt lockdown ...'
"Kburi li bqajt nirreżisti l-għajta għal-lockdown u mingħajr lockdown ġibna riżultat illi l-WHO qalu li aħna mudell li jridu jimxu fuqu pajjiżi oħrajn. Lock down kien ifisser tkissir tal-ekonomija u dwejjaq. Salvajna lin-negozji tagħna," qal il-PM
Huwa spjega kif il-pajjiż għadda minn realtà li kien ilu ma jgħaddi minnha mill-gwerra, għalkemm qal li huwa kburi bil-miżuri kollha li ttieħdu fuq livell ekonomiku mill-Gvern. "Dejjem emmint li se jisbaħ jum ġdid u aħjar. Għandi fiduċja sħiħa fil-poplu li kien responsabbli u obda d-direttivi u fiduċja sħiħa fl-awtoritajiet tas-saħħa."
"Illum sebaħ jum isbaħ minn ieħor, imma ma jfissirx li kollox għadda," qal Abela.
Dan tħabbar hekk kif in-numri ta' persuni bil-Covid-19 f'pajjiżna baqa' nieżel b'aktar nies ifiequ milli każi ġodda kuljum. Dan wassal biex il-każi attivi baqgħu jonqsu jum wara ieħor għal 110 lbieraħ. Illum, fil-fatt reġa kien hemm żewġ każijiet ġodda biss ħabbar il-Ministru tas-Saħħa u Deputat PM Chris Fearne fl-istess konferenza.
