Ella Borg Degiorgio (Atletika) u Kai Azzopardi (Triathlon) huma r-rebbieħa tal-premju Atlas Atleta Żagħżugħ tax-Xahar għal Lulju 2026.
Ella Borg Degiorgio temmet l-istaġun tal-atletika b’mod eċċellenti hekk kif għal darb’oħra kisret ir-rekord nazzjonali fil-pole vault. L-atleta żagħżugħa stabbilixxiet rekords nazzjonali ġodda kemm fil-kategorija Under-16 kif ukoll f’dik Under-18.
Din il-prestazzjoni tkompli tikkonferma l-progress notevoli ta’ Borg Degiorgio matul dan l-istaġun u tpoġġiha fost l-aktar atleti żgħażagħ promettenti fl-atletika Maltija.
Min-naħa l-oħra, it-triatleta Kai Azzopardi għamel l-istorja għat-triathlon Malti hekk kif sar l-ewwel triatleta Elite Malti li qatt tela’ fuq il-podju f’World Triathlon Development Regional Cup.
Azzopardi kiseb il-midalja tal-bronż fil-World Triathlon Development Regional Cup 2026 f’Vlasina Lake, is-Serbja, fis-26 ta’ Lulju.
Dan ir-riżultat huwa pass importanti għal Azzopardi u għat-triathlon Malti, hekk kif kiseb l-ewwel midalja internazzjonali tiegħu tal-istaġun u kkonferma l-progress tiegħu fix-xena internazzjonali.
Il-premju Atlas Atleta Żagħżugħ tax-Xahar għal Lulju se jiġi ppreżentat lir-rebbieħa minn Robert Micallef, Chief Commercial Officer ta’ Atlas Insurance. Il-Malta Sports Journalists Association se tkun irrappreżentata mill-Viċi-President Paul Cachia.
Dan il-premju huwa inizjattiva konġunta bejn il-Malta Sports Journalists Association u Atlas Insurance. Il-bord ta’ ġudikatura jqis il-kisbiet kollha taż-żgħażagħ matul ix-xahar inkwistjoni u jistieden lill-assoċjazzjonijiet u l-federazzjonijiet sportivi lokali sabiex jibagħtu n-nominazzjonijiet tagħhom għall-kunsiderazzjoni jekk iqisu li xi wieħed mill-atleti tagħhom taħt il-21 sena spikka matul dak ix-xahar.
Ir-rebbieħa kollha ta’ kull xahar ikunu eliġibbli għall-premju annwali.
In-nominazzjonijiet għal dan il-premju jistgħu jintbagħtu permezz ta’ email fuq [email protected]. Ir-regoli u r-regolamenti tal-premju jistgħu jidhru fuq is-sit elettroniku tal-Malta Sports Journalists Association.
.jpg)
