Raġel Estonjan ta’ 51 sena ammetta li deher għarwien f’funtana pubblika f’Ħaż-Żebbuġ wara li allegatament daħal f’mħatra ta’ €200 ma’ sħabu.
Rainer Korgesaar, li m’għandux indirizz fiss f’Malta, wieġeb ħati għal żewġ akkużi marbuta mal-inċident li seħħ fi Pjazza San Filep għall-ħabta tal-11:15pm fit-30 ta’ Settembru.
Skont l-akkużi, Korgesaar offenda l-pudur jew il-morali billi deher għarwien ġewwa l-funtana u ħareġ minnha mingħajr ħwejjeġ.
Huwa ġie akkużat ukoll li ma kienx liebes b’mod xieraq f’post pubbliku, kemm waqt li kien fil-funtana kif ukoll meta ħareġ minnha.
Il-prosekuzzjoni qalet fil-Qorti li l-Pulizija kienet irċeviet rapport dwar raġel għarwien fil-funtana.
Meta l-uffiċjali marru fuq il-post, Korgesaar allegatament qalilhom li kien xorob flixkun whisky u li kien daħal fil-funtana bħala parti minn mħatra ta’ €200 ma’ sħabu.
Huwa ammetta l-akkużi quddiem il-Maġistrat Nadia Helena Vella.
Il-Qorti ssospendiet il-każ għal aktar tard il-Ġimgħa, meta mistennija tingħata s-sentenza.
Il-prosekuzzjoni tmexxiet mill-Ispettur John Sammut, filwaqt li l-Avukat Silvan Pulis deher għall-akkużat.
Il-Ministru għall-Intern Glenn Bedingfield: “Dan il-qżież m’għandniex x’nambuh,”
Il-Ministru għall-Intern Glenn Bedingfield qal li talab lill-Uffiċjal Prinċipali tal-Immigrazzjoni jikkunsidra t-tkeċċija ta’ raġel Estonjan marbut mal-inċident li fih persuna dehret għarwiena f’funtana fil-pjazza ta’ Ħaż-Żebbuġ.
“Dan il-qżież m’għandniex x’nambuh,” qal Bedingfield, filwaqt li żied: “Tlabt lill-Uffiċjal Prinċipali tal-Immigrazzjoni jikkunsidra t-tkeċċija ta’ dan ir-raġel Estonjan. Aħna mhux pajjiż taż-żufjett.”
Il-kummenti tiegħu jaslu wara li filmat li ċċirkola fuq il-midja soċjali wera raġel joħroġ għarwien mill-funtana fil-pjazza ta’ Ħaż-Żebbuġ, waqt li persuni fil-qrib kienu qed jiffilmjawh. Wara, ir-raġel deher jiġbor il-ħwejjeġ tiegħu minn mal-art u jitlaq minn fuq il-post.
Il-Pulizija kienet qalet li ġiet infurmata bl-inċident għall-ħabta tal-11pm u li kienet qed teżamina filmati tas-CCTV biex tidentifika u ssib lir-raġel.
Il-każ qajjem reazzjoni pubblika wara li l-filmat infirex online, u issa Bedingfield qal li qed jitlob li l-awtoritajiet tal-immigrazzjoni jeżaminaw jekk ir-raġel għandux jitkeċċa minn Malta.
S’issa għadu mhux magħruf jekk ittieħditx deċiżjoni dwar it-tkeċċija tiegħu.
